Саҥа сүүрээн олоххо-дьаһахха сэргэхсийиини үөскэтэр. Таҥараианство - саҥа итэҕэл. Ол быһыытынан култуураттан, искусствоттан, таҥнар таҥастан саҕалаан дьиэ тэрилигэр, аска-үөлгэ тиийэ сонун уларытыылары киллэриэҕэ.
Холобур, билиҥҥи Ыһыах языческай, фольклорнай хабааннаах буолан, саҥаны киллэрэр кыаҕа суох, уруккубут умнуллубатын туһугар үлэ ыытыллар. Ол курдук быйыл саха таҥаһыгар күрэххэ, чахчы да үчүгэй, былыргылыы күрүмэ этэрбэстээх, тииҥ кутуруга моойторуктаах, былыргы саха тойотторо кэтэр сахалыы моһуоннаах истээх сонноох көстүүмү тигэн кэппит дьон Саха бастыҥ таҥаһа күрэххэ бастыахтарын бастаатылар. Эһиил эмиэ итинник сөргүтүллүбүт саха былыргы таҥаһа күрэххэ бастыаҕа. Ити былыргы истииллээх таҥастары билиҥҥи киһи таҥас гынан күн аайы таҥныбата чуолкай. Дьахталлар Ыһыахха анаан тиктибит былыргылыы моһуоннаах былачыйаларын сайын 1-2 эрэ күн кэтэллэр.
Оттон Таҥараианство сахалыы истииллээх аныгылыы, киһи күннээҕи олоҕор кэтэр кыһыҥҥы-сайыҥҥы таҥаһыгар күрэх биллэрэн, саха таҥаһа дьон-сэргэ ортотугар киэҥник тарҕанарыгар суолу аһыаҕа.
Худуоһунньуктар Таҥараианство итэҕэлигэр сыһыаннаах саҥа, сонун хартыыналары суруйуохтара. Холобур, "Айыы Тойон Таҥара (таҥараианство) Ыһыаҕа " диэн болотунаны айбыт худуоһунньук ити үлэтинэн историяҕа киириэҕэ.
Таҥараианство итэҕэлин туһунан опера, балет, бэртээхэй ырыалар баар буолуохтара.
Прикладной искусствоҕа аан бастакынан Таҥараианство Кириэстээх харысхаллар, араас оҥоһуктар дэлэйиэхтэрэ.
Айыы утаҕын - быырпаҕы ыал барыта оҥостон иһэр буолуоҕа, лабырыгы астыахтара о.д.а. Лабырык уонна быырпах домнуо быйыл-эһиил Алгыс, Иччилэргэ-Айыыларга айах тутар сүрүн астарынан буолаллара сабаҕаланар.
Алгысчыттар "Дом!" дииллэрин дьон сөбүлээбэккэ"Оом!" - диир болуохтара.
Биир тылынан эттэххэ, норуот айар дьоҕура муҥура суох, онон бииртэн-биир сонун айымньылар, таҥастар-саптар, дьиэ тэриллэрэр, онтон да атын оҥоһуктар төрөөн-тахсан иһиэхтэрэ.
Олох иннин диэки кимиилээхтик хааман, сайдан иһэр. Ону кытта бииргэ, тутуспутунан Таҥараианство – Айыы Тойон Таҥара итэҕэлэ, олохпутугар улам өтөн киирэн иһиэҕэ.
Хаартыскалар интернеттэн ылыныллылар.
