Киирии

Киирии

Алтынньы 14 күнэ - биир бэлиэ күн. Бу күнү православнайдар Бокуруоп диэн ааттаабыттарын биһиги сахалар билиҥҥэ диэри үтүктэн илдьэ сылдьабыт.

Бу күн Кыһын саҕаланар, онон биһиги курдук уһун кыһыннаах тымныы, тыйыс дойду олохтоохторугар улахан бэлиэ күн буолара, онон былыр дьиҥ сахалыы ааттааҕа сэрэйиллэр даҕаны, өйдөнөр даҕаны. Дьиҥинэн биһиги өбүгэлэрбит Бокуруобу ДЬЫЛ диэн ааттыыллара. Ол курдук, Пекарскай тылдьытыгар Дьыл диэни - атын өйдөбүллэри сэргэ, СЫЛ КЭМЭ диэн быһаарбыта баар.

ug1

ДЬЫЛ диэн Сыл саамай тымныы биримэтин хабар Сыл кэмэ сахаларга эрэ баар.

ДЬЫЛ уһуна - 220 хонук. Бу Кыстык кэмэ. Дьыл саҕаламмыта 110 хоммутун кэннэ - олунньу 1 күнүн ДЬЫЛ ОРОЙО диэн ааттыыллар. Ол эмиэ биир бэлиэ күн. Ити кэмҥэ сүөһү сиир отун, бэйэҥ хаһаас аһыҥ аҥара хаалбыт буоллаҕына, ол аата, Дьылы этэҥҥэ тахсаҕын, эбэтэр Дьылы туоруугун диэн буолар. Оттон онтон кыра буоллаҕына от атыылаһар туһунан толкуйдуургар, ас эбии көрдөнөргөр тиийэҕин.

ДЬЫЛ ТАХСЫЫТА - 220 хонуктаах тымныы кэм бүтэн КҮӨХХЭ ҮКТЭНИИ КҮНҮТТЭН - Ыам ыйын 22-гэр бэлиэтэнэр, сүөһү сыһыыга баран уоһунан аһыыр, Кыстык кэмэ бүтэр, улахан үөрүү буолар. Сахаларга бу күнтэн Сайын кэлэр, Саҥа сыл саҕаланар.

ДЬЫЛ САҔАЛАНЫЫТА. АЙЫЛҔА УОННА ОЛОХ-ДЬАҺАХ

ug4

ДьЫЛ саҕаланыытыгар ДЬЫЛ ОҔУҺА (билигин ЭҺЭЭ ДЬЫЛ ОҔУҺА ДЭНЭР) Хотугу Муустаах Байҕалтан тахсар. Оҕус бу кэмҥэ муоһа өссө да үүнэ илик буолан баран, муоһун үнүгэстэриттэн тымныы син биир аргыйар, ол иһин Саха сиригэр өксүөннээх, тымныы күн-дьыл, Кыһыҥҥы кэм, Кыстык саҕаланар.
Эһээ Дьыл Оҕуһун малааһыннаан көсөр, Саха сиригэр Дьыл кэлбитин, Кыһын саҕаламмытын, Кыстыкка киириини биллэрэр.

Кыстык хаара түһэр, күөл мууһа турар. Былыр бу кэмҥэ бэл муҥха саҕаланара, идэһэ сиэнэрэ. Ол гынан баран билигин Аан дойду үрдүэн халлаан сылыйан, муус чараас, субу-субу ириэрии буолар, онон идэһэ өлөрөр эрдэ. Муус туран муҥхалыыр да буоллахха, ириэһинтэн собо аһыйыан сөбүн өйдөөн туран балыктаныахтаах.

Сэтинньигэ киирэн баран идэһэлэнэр ордуга буолуо. Хаппыыстаны халлаан күүскэ тымныйарын кэтэспэкэ билиҥҥиттэн тууһаан барыахха сөп. Ол курдук температура Угаров шкалатынан 0 кыраадыһы (Цельсийинэн +4 кыраадыһы) атыллаата да, таһырдьа ас буорту буолбат, хаппыыста аһыйбат.

АЛТЫННЬЫ 14 КҮНҮН БОКУРУОП ДИЭБЭККЭ САҤА ДЬЫЛ ДИЭХХЭ

ug5

Дьэ онон, сахалар мантан инньэ алтынньы 14 күнүн БОКУРУОП диэбэккэ, Дьылбыт саҥалыы үүнэринэн сибээстээн, САҤА ДЬЫЛ диэхтээхпит диэн Таҥараианство этэр. Кэпсэтиибитигэр САҤА ДЬЫЛ КЭЛБИТИНЭН! САҤА ДЬЫЛ ҮҮММҮТҮНЭН!- диэн эҕэрдэлэһиэхтээхпит, САҤА ДЬЫЛ кэллэ, саҕаланна, САҤА ДЬЫЛ үүннэ дэһиэхтээхпит.

Билигин Үөрэх Дьыла диири ким да омнуолаабат. Саха театра ТЕАТР ДЬЫЛА саҕаланна диир буолла. Атын да театрдар Театр сезона дииллэрин тохтотон, Саха театрын холобурун батыһан, сотору кэминэн эмиэ ТЕАТР ДЬЫЛА саҕаланна дииллэрин истиэхпит диэххэ. НВК САХА былырыын күһүн быйылгы Телевидение дьыла саҕаланна дии сылдьан баран, тоҕо эрэ тохтообут курдук. Баҕар кинилэр эмиэ толкуйданыахтара диэн эрэниэххэ.

Саас ДЬЫЛ МУУҺА КӨТӨҔҮЛЛЭР, ДЬЫЛ БӨҔҮН хомуйуллар...

 

САҤА ДЬЫЛ САҔАЛАНЫЫТЫН ҮӨРҮҮЛЭЭХТИК БЫРААҺЫННЬЫКТААН КӨРСӨР

ҮТҮӨ ҮГЭҺИ ҮӨДҮТҮӨХХЭ

ug3

БИҺИГИНИ ААН ДОЙДУГА ААТЫРДЫБЫТ, ААТЫРДАР ДА КЫАХТААХ КЫЫДААННААХ КЫҺЫН ҮҮНЭР,   КЫПЧЫТТАРЫЫЛААХ КЫСТЫК КЭМЭ САҔАЛАНАР, ОЛ ДА БУОЛЛАР, САХАЛАРГА ЭРЭ БААР, БИҺИЭХЭ ТЫЫН СУОЛТАЛААХ СЫЛ БИИР КЭРЭ-БЭЛИЭ КЭМЭ БУОЛАРЫНАН САҤА ДЬЫЛ САҔАЛАНЫЫТЫН ҮӨРҮҮЛЭЭХТИК БЫРААҺЫННЬЫКТЫЫР ҮТҮӨ ҮГЭҺИ ҮӨДҮТҮӨХХЭ БААР ЭТЭ.

Кэлин бу Бырааһынньык ситэн-хотон бардаҕына атын сиртэн элбэх туристары угуйар тэрээһин буолар кэскиллэниэн   сөп курдук.

Ону туох дии саныыгыт?

Оттон билигин хас биирдии ыал уонна араас тэрээһиннээх түмсүүлэр Алтынньы ый 14 күнүгэр үүнэр Саҥа Дьылы малааһыннаан, үөрэн-көтөн көрүстэххитинэ, Дьылы этэҥҥэ туоруургутугар эрэлгит улаатыаҕа, онно Айыы Тойон Таҥарабыт көмөлөһүөҕэ.

Онон барыгытын кэлэн иһэр САҤА ДЬЫЛЫНАН ЭҔЭРДЭЛИИБИН!

Бука баһаалыста, Тохсунньу 1 күнүгэр көрсөр Григорианскай САҤА СЫЛБЫТЫН Алтынньы 14 күнүгэр үүнэр САҤА ДЬЫЛЫ кытары бутуйумаҥ.

Тарҕат:

Комментарии

Защитный код Обновить