Войти

Войти

Аан дойдуга Коронавирус ааҥнаабытынан сибээстээн, туох баар иһитиннэрэр-көрдөрөр эйгэ бүтүннүү күнү-күннээн дьону куттуур сонуну тарҕата турар. Ордук саастаах дьоҥҥо психологическай атаака оҥоһуллар курдук. Онон ыалдьыа да суох дьон ыалдьан барар туруктаннылар.

Бу кэмҥэ дьоҥҥо төттөрүтүн уоскутар, санааларын күүһүрдэр психологическай көмө наада. Ону киһи барыта психолог көмөтүнэн туһанар кыаҕа биһиэхэ суох.

Ол гынан баран, биһиги итэҕэллээхпит. Итэҕэл киһиэхэ күннэҕи олоҕор, ыарахан кэмигэр күүс-көмө буолуохтаах. Онно анал Алгыстар көмөлөһөллөр.

Таҥараианство итэҕэлэ киһи сааһыттан, ханнык итэҕэллээҕиттэн тутулуга суох – христианин, ислам, язычник да итэҕэллээх буол, син биир барыларыгар көмөлөһөр Алгыстаах. Ол Алгыһы Христианнар бары билэр "Отче наш..." диэн малыыппаларын курдук эмиэ саха барыта билиэхтээх, күннээҕи олоҕор туттуохтаах.

Биллэрин курдук, киһи санаа кулута. Киһи эгди буоларыгар киниэхэ туһуламмыт бэрт аҕыйах да үтүө тыл туһалаах буолар. Оннук үтүө тылы киһи бэйэтин эйгэтин дьонуттан бэрт сэдэхтик истэр. Оттон Айыы Тойон Таҥара эйигинниин куруук бииргэ баар, эйиэхэ куруук үтүөнү эрэ баҕарар, эйигин харыстыыр, араҥаччылыыр. Ол туһугар Айыы Тойон Таҥараҕа Алгыс этиэхтээххин, көрдөһүөхтээххин. Оччоҕо Айыы Таҥарабыт - Улуу психотерапевт, хайаан да көмөлөһөр. Онно бүк эрэниэхтээххин.

Айбыт Айыы Тойон Таҥарам!

Айхал Эйиэхэ!

Уруй Эйиэхэ!

Эн сырдык ньууруҥ иннигэр

Нөрүөннээх бэйэм

Нөргүйэн турабын!

Айбыт Айыы Таҥарам!

Ыалдьа сылдьар

Ыарыыларбын

Ылҕаан кэбис!

Түөрт куппун чөл гын!

Ыарыылары ыкслатыма!

Алҕас оҥорбут аньыыларбын

Алы гын!

Туора-маары хаамтарыма,

Толоос быһыыны оҥотторума!

Барҕата баардыт!

Соргута дугут!

Айбыт Айыы Тойон Таҥарам!

Эйигин итэҕэйэр буоламмын

Аллараанан-үөһээннэн,

Түөрт өттүбүттэн

Төгүрүччү харысхаллаахпын!

Ол иһин

Туохтан да толлубаппын

Туохтан да куттаммаппын.

Туох да самнарбат,

Туох да охторбот!

Толору дьоллоохпун!

Кэлэр кэскиллээхпин!

Ол иһин Эйиэхэ

Айыы Тойон Таҥарабар

Барҕа Махтал,

Айхал мичил,

Уруй-туску буоллун!

Уруй туску!

Туску! Тускуо!

Бу Алгыһы хаһан наада буолла да,   сарсыарда туруоҥ иннинэ, эбэтэр тураат, онтон киэһэ утуйуоҥ иннинэ этиэхтээххин, оччоҕо Уйулҕаҥ уһуктан күрүөлээх-хаһаалаах, көмүскэллээх курдук сананан, бэйэҕэр эрэллээх буолаҕын,   ыалдьыбаккын-сүппэккин.

Онон бу Таҥараианство Алгыһы тутуннаххытына олоххутугар улаханнык туһалыа, олоххутун чэпчэтиэ, чэгиэн-чиргэл, ситиһиилээх буоларгытыгар көмөлөһүө диэн эркин курдук эрэнэбин.

Гавриил Угаров – Таҥараианство итэҕэлин төрүттээччи

2020 с. Кулун-тутар 23 к.

Б.т.8-914-237-10-80

Тарҕат:

Добавить комментарий