Киирии

Киирии

Мэҥэ Хаҥалас улууһун Бырама бөһүөлэгин сис ыала Альбина, Иннокентий Поповтар тэлгэһэлэрэ ыраахтан киһи эрэ сөҕүөн, үөрүөн-көтүөн курдук ураты тупсаҕай оҥоһуулаах.  Алта оҕону көччөх гынан көтүппүт, 11  сиэннээх дьоһун мааны  ыал аҕа баһылыга Иннокентий Васильевич мындыр толкуйдаах, тимири да, маһы да ыллатар уус буолар. Олорор тэлгэһэлэригэр атахха турар ампаартан саҕалаан таатталыы муннуктаах балаҕан, сайыҥҥы дьиэ, уһанар дьиэ, гараас о.д.а тутуулар дьэндэһэн тураллар. Бу көстөр сад олбуорун кыыстара Айанесса дизайннаан күтүөтүнээн Мичиллиин оҥорбуттар. Сиэн кыргыттар Куннэй, Алина уруһуйдаабыттар. Сайын аайы тэлгэһэ оҕо чуор саҥатынан туолар. 

Күннэй, Бырама оскуолатын III кылааһын туйгун үөрэнээччитэ:

-- Үөрэхпэр кыһаллан үөрэнэбин. Уруһуйдуурбун, үҥкуулуурбун, ыллыырбын кыра эрдэхпиттэн сөбүлүүбүн. Ити полисадник аанын уруһуйдуурбутугар эдьиийбит Айанесса көрдөрөн сүбэлээн биэрбитэ. Дьиэбэр эмиэ ону-маны араастаан киэргэтэрбин олус сөбүлүүбүн. Эбэлээх эһээбэр чугас олорор буолан күн аайы кэриэтэ кэлэн оонньоон-көрүлээн, атаахтаан барабын. Эбэ минньигэс аһынан күндүлүүр.


          Алина, Дьокуускай 2-с ¹-дээх оскуолатын III кылааһын үөрэнээччитэ:

-- Мин үөрэх сынньалаҥын аайы эбэлээх эһэбэр тахсан киирэбин. Эбэлээх эһэ сылаас хоонньуларыгар утуйан атаахтыыбын. Үс саастаахпыттан уруһуйдуубун. Уруһуйдуурбун, гимнастиканан дьарыктанарбын, үҥкүүлүүрбүн ордоробун. Эбэм аах тэлгэһэлэрин  киэргэтэрбитигэр олус кыһанан уруһуйдаабыппыт. Ол уруһуйбут табыллыбытыттан үөрэбин. Дэриэбинэ ыалын оҕолоро бары наһаа сэргээбиттэрэ. Онтон ыла мин уруһуйу өссө сөбүлээбитим. Билигин эбэлээхпэр астына-дуоһуйа сайыммын атаара сылдьабын. Күннэйдиин  туһа дьонобут. Ньирэйдэри көрдөөн аҕалабыт, оҕуруокка, сибэккигэ уу кутабыт.

Сатабыл кистэлэҥэ

Мындыр уус эһэ Иннокентий Васильевич:

--Миэхэ уһанар талаан эһэбиттэн бэриллибит буолуон сөп. Наар батыһыннара сылдьара. Уус абылаҥар ылларан аармыйа кэнниттэн төрөөбүт дойдубар олохсуйан, манна тутуу биригээдэтин тэринэн элбэх дьиэни туппуппут. Билигин төһө да саас ыллар, өссө саҥаттан саҥаны оҥоро сатыыбын. Оҕолорбутун, сиэннэрбитин үлэҕэ сыстаҕас, үлэни таптыыр, ханнык да үлэттэн толлон турбат гына үөрэтэн улаатыннартаатыбыт. Аны билигин сааһыран да баран, сиэттэрбитин үлэҕэ уһуйабыт. Үлэ – дьол диэн санаалаахпыт. Оҕолорбор,  сиэттэрбэр бэйэм тутан-хабан оҥорбутум араҥаччылыа. Биир дойдулаахтарым, дьонум тугу эмэ көрдөстүлэр да, быһа гыммакка оҥоробун, тиэхиньикэ алдьаммытын өрөмүөннүү охсон биэрэбин. Уһанар дьиэм,  гарааһым аана өрүү “аһаҕас”. Дьон кэлэн сүбэлэтэрэ, дьоҥҥо үчүгэйи оҥорортон ордук туох баар буолуой?! Онон, мин үлэнэн дьоллоох киһибин! Оҕолоор, сатабыл сүрүн кистэлэҥэ итиннэ сытар!

Кэрэҕэ, сырдыкка тардыһар, кэрэни өйдөөн көрөн сайыннарар ураты дьикти күүс. Оҕолоор, сир ийэҕэ сырдыгы айар, үөрүүнү саҕар хас биирдиибититтэн тутулуктаах. Ол буолар – ситиһии төрдө, олох саҕыллар дьоло! Айыҥ-тутуҥ, кэрэни кэрэхсээҥ! 

Ангелина КУЗЬМИНА.

Тарҕат:

Ырытыыгын суруй

Защитный код
Обновить