Сыныйан көрдөххө Айыы Таҥара үөскээбит Кыһыл көмүс сымыытын аллараа өттө Алтан хахтах эбит.
Сымыыт ортотунан кытаанах быыстаах. Ол быыс аллараа өттүгэр Айыы Таҥара Игирэ Быраата эмиэ утуйа сыппыт, онтон кэмниэ кэнэҕэс Айыы Таҥара 9 халлааны айан бүппүтүн кэннэ биирдэ хойутаан уһуктубут уонна били кытаанах Быыһы сэгэтэн Орто Дойдуга тахсан кэлбит.
Тахсаат, араас куһаҕан тылынан үөхсэ-үөхсэ Орто Дойдуга Айыы Таҥара айан оҥортообутун алдьаталаан, Аар Кудук Маһы иэҕэҥнэтэн барбытыгар Айыы Таҥара кыыһырбыт.
Бииргэ сатаан олоруо, үлэлиэ суохтарын билэн: «Эн төннөҥҥүн Сымыыт аллараа өттүн оҥостоҥҥун бас билэн хаһаайыннаа!» - диэбит.
Ону Быраата – Арсан Дуолай сөбүлэһэн, төннөн түһэн Айыы Таҥара оҥорбутун үтүгүннэрэн Аллараа Дойду 9 халлаанын оҥорбут. Ол халлааннарыгар көмөлөһөөччүлэрин, араас Абааһылары олордуталаабыт.
Аллараа Дойду абааһылара Орто Дойдуга тахса сылдьан дьону муокастыахтарын, ыарытыннарыахтарын сөп. Айыы Таҥараҕа үҥэн абааһылар дьайыыларыттан күрүөлэниллэр, харыстаныллар.
Аллараа Дойду Орто Дойдуну кытары быысаһар сирэ Уот Кудулу Байҕал буолбут, ону билиҥҥиннэн толкуйдаатахха Сир магмата буолуон сөп курдук.
Үөһээ Дойду 9 халлаана Үрүҥ дьайдаах буоллаҕынаа, Аллараа Дойду 9 Халлаана барыта хара дьайдаах, барыта утары, атыннык эттэххэ, Аад дойдута. Ол аата Аллараа Дойдуну эбэтэр Аады биһиги антиматерияттан турар Антимир курдук өйдүөхтээхпит.
Биллэрин курдук, Материя Антиматерияны кытта тиксистэҕинэ улахан эстии буолар. Киһи дууһата материальнай. Оттон улахан аньыыны оҥорбуттар Дууһалара антиматерияттан турар Аллараа Дойдуга утаарыллаллар. Ол аата Дууһалар Аадка түһэн аннигиляцияланаллар. Дьиктитэ диэн, Аньыылаах Дууһа ол Аллараа Дойдуга түһэн баран эмискэ күлүм гыммат, эбэтэр эстибэт, уһуннук умайан эрэйдэнэн, сордонон-муҥнанан суох буолар.Ол туһунан үгүс Итэҕэл кинигэлэригэр суруйаллар.
А.Эйнштейн теориятын быһыытынан бириэмэ хаамыыта куруук биир тэҥ буолбат. Онон сылыктаатахха Аллараа Дойду бириэмэтэ биһиэниттэн быдан бытааннык устар буолуон сөп. Ол иһин материя антиматерияны кытары тиксистэҕинэ эстибэт, ол курдук, аньыылаах-харалаах киһи Дууһата бытааннык умайар, эбэтэр бытааннык аннигиляцияланар эбит диэхпитин сөп.
САХА СИРЭ ТОҔО ОРТО ДОЙДУ ДИЭН ААТТАММЫТАЙ?
Орто Дойду диэн бу - САХА СИРЭ.
Өскөтүн дьоппуоннар дойдуларын Күн тахсар дойдута (Страна восходящего Солнца), кэриэйдэр Чэбдик сарсыарда дойдута (Страна утренней свежести), кытайдар – Халлаан аннын дойдута (Поднебесная), диэн ааттыыр буоллахтарына биһиги өбүгэлэрбит былыр-былыргыттан Сахабыт сирин Орто Дойду (Серединный мир) диэн ааттыыллара.
Чинчийээччилэр сахаларга былыр Аллараа Дойду диэн өйдөбүл суох этэ диэн суруйаллар. Онон Үөһээ уонна Аллараа дойдулар баалларын православнай итэҕэл үөрэҕиттэн билбиттэр дииллэр.
Ол гынан баран, биһиги өбүгэлэрбит Үөһээ уонна Аллараа Дойду диэннэр баалларын былыр-былыргыттан таайан билэллэр эбит быһыылаах. Кинилэр Саха сирэ Үөһээ уонна Аллараа дойдулар быысаһар сирдэригэр сытар дии саныыр буолан, бэйэлэрин дойдуларын ОРТО ДОЙДУ диэн ааттаабыт буолуохтарын сөп. Икки араас-араас дойду ыпсыһар миэстэтигэр, олор ортолоругар сытар Сир, эбэтэр Орто Дойду диэн.
Ыаллыы дойдуларбыт ааттарын кытта тэҥнии тутан ырыҥалаан көрдөххө, Сахабыт сирэ, билигин ааттанарыныы Олоҥхо дойдута иҥин дэммэккэ эрэ, дьиҥнээх норуот бөлөсүөпүйэтигэр уонна итэҕэлигэр олоҕуран ааттаммыт аатынан хаалбыта буоллар ордук буолуо эбитэ дуу - диэн санааҕа кэлэҕин. Дьиҥинэн, Страна Восходящего солнца, Страна Утренней свежести, Прднебесная и Серединный мир диэн ыаллыы дойдуларбыт ааттарын кытта биирдик, биир сокуоҥҥа, биир матыыпка олоҕуран ааттааммыт ааппыт этэ буоллаҕа.
Айыы Таҥара Тайаҕа тайаммыт, Аар Кудук Мас силис тарпыт, саҥардыллыбыт Тенгрианство - Таҥараианство үөскээбит дойдута – Орто Дойду – Саха сирэ араас омук Айыы Таҥараны итэҕэйээччилэрэ кэлэн үҥэн-сүктэн, күүс-кмө ылан барар, мусульманнарга Мекка курдук, Ытык сирдэринэн буолуоҕа
Сэҥээриилэр