Өрөспүүбүлүкэ киин куоратын баһылыгар хандьыдаатынан туруорунааччылартан регистрацияланар докумуоннары тутуу от ыйын 30 күнүгэр киэһэ 18 ч. түмүктэннэ.
Куорат быыбардыыр хамыыһыйатыгар 12 киһи баһылык буоларга киирсэрин биллэрэн, докумуоннарын туттарбыт. Кинилэртэн биир бастакынан дьиҥ регистрацияны ааспыт хандьыдааттар: Дьокуускай Дууматын бэрэссэдээтэлэ Александр Саввинов (“Биир Ньыгыл Арассыыйа”) уонна урбаанньыт Владислав Теппор (ЛДПР). Кинилэри сэргэ кыттар баҕаларын биллэрбиттэр Ил Түмэн дьокутаата Владимир Федоров («Родина»), урбаанньыттар: Сергей Асютин (Арассыыйа бэтэрээннэрин баартыйата), Иван Степанов («Сиэрдээх Арассыыйа»), Иван Комаров («Гражданскай платформа»), Степан Подаруев («Честно»), Игорь Любарский («Арассыыйа патриоттара»), «Алмаз» телерадио-хампаанньа генеральнай дириэктэрэ Микаэл Заболотнай (Партия роста), «Аэроторгсервис» производственнай-кэмиэрчэскэй холбоһук салайааччыта Сардана Авксентьева (Партия возрождения России). Ону тэҥэ бэйэлэрин туруорунааччы быһыытынан (самовыдвиженец) кытталларын биллэрбиттэр: 2 №-дээх өрөспүүбүлүкэ балыыһатын юриһа Михаил Лукин уонна «Округ ТВ» генеральнай дириэктэрэ Олег Желнин.
Бэйэлэрэ киирсээччилэр баартыйаттан турбуттартан уратылара – өйөөччүлэриттэн илии баттааһыны хомуйан киллэриэхтээхтэр. Ахсааны таһынан быыбар хамыыһыйата хандьыдатынан турааччылар төһө кырдьыктаах иһитиннэриини биэрбиттэрин сыныйан үөрэтэр. Баһылыкка туруорунарга, аҕыйаабыта, 895 илии баттааһына баар буолуохтаах. Аҕыйах күн иһигэр ону ситиһэр судургута суох. Михаил Лукин ирдэнэр ахсааны кыайан ситиспэккэ хаалбыт.
Манна даҕатан эттэххэ, билиҥҥитэ куорат Дууматын төрдүс ыҥырыылаах мунньаҕар 9 баартыйаттан 250 бэрэстэбиитэл туруоруммута биллэр. Иннинээҕи быыбарга 22 баартыйаттан 400 хандьыдаат турбута. Биир мандааттаах быыбардыыр уокуруктан бу сырыыга 98 киһи регистрацияламмыт. Оттон Дьокуускай куорат уокуругун дьокутаатыгар чопчу кимнээх хандьыдаатынан туран, регистрацияны ааспыттарын толору испииһэгэ атырдьах ыйын 8 күнүгэр биллиэ.
