Бу күннэргэ Дьокуускай куоракка Набережнай уокуруктан Ил Түмэҥҥэ дьокутаакка кандидат Мария Христофорованы өйүүр дьон кэккэлэрэ хаҥыыр. Ааспыт субуота күн, Ил Сүбэ уопсастыбаннай тэрилтэ чилиэннэрэ мустан кинини өйүүргэ анаан кэпсэтии ыыттылар.
Ил Сүбэ кыттыылаахтара, өрөспүүбүлүкэҕэ киэҥник биллэр, ытыктанар дьон: судаарыстыбаннай-бэлитиичэскэй деятель, учуонай Егор Жирков, бэлиитик, уопсастыбаннай деятель Афанасий Максимов, поэт, суруналыыс Иван Николаев-Уххан, норуот таптыыр ырыаһыттара – Аскалон Павлов, Лэгэнтэй, урбаанньыт Афанасий Алексеев “Мария Николаевна дьиҥ-чахчы үлэһит киһи, норуотун туһугар ис сүрэҕиттэн ыалдьар, ылыннарыылаах тыллаах, уопуттаах салайааччы, онон дьокутаат буолар кыахтаах”, – диэн эттилэр уонна кинини өйүүллэрин биллэрдилэр. Бу түмсүүгэ кыттыыны ылбыт дьокутаакка кандидат штабын чилиэннэрэ, итэҕэллээх дьоно: уопсастыбаннай, судаарыстыбаннай деятель Екатерина Васильева, Саха сирин суруналыыстарын сойууһун салайааччыта Галина Бочкарева, поэтесса, суруналыыс Наталья Михалева-Сайа, “Айыы кыһата” оскуола дириэктэрэ Лидия Шамаева, “Аврора” медицинскэй клиника дириэктэрэ Светлана Яковлева, “Ситим” медиа-бөлөх суруналыыстара Иван Гаврильев, Афанасий Гкринов – Арчылан эмиэ М.Н.Христофорова Ил Түмэн дьокутаата буоларга чахчы сиппитин-хоппутун, парламеҥҥа наадалааҕын эттилэр уонна кини кандидатуратын өйүүргэ Ил Сүбэни кытта бииргэ үлэлиир туһунан сүбэлэстилэр.
Бу кэпсэтии үгэннээн бара турдаҕына , «Сир» уопсастыбаннай хамсааһын салайааччыта, эмиэ Набережнай уокуруктан Ил Түмэҥҥэ дьокутаакка кандидат Иван Степанов тиийэн кэллэ. Кини үчүгэйдик толкуйдаан баран, саха норуота сомоҕолоһорун туһугар, дьоһуннаах кандидат Мария Христофорова туһатыгар бэйэтин кандидатуратын устунан кэлбитин туһунан иһитиннэрдэ. Мустубут дьон кини этиитин ытыс тыаһынан доҕуһуоллаатылар. Кини саамай сөптөөх быһаарыныыны ылбытын хайҕаатылар.
Онон күн бүгүн биир мандаттаах бу уокурукка үс кандидат баар: “Саханефтегазсбыт” АУо генеральнай дириэктэрэ Игорь Никитин, ЛДПР баартыйаттан Игорь Синченко уонна соҕотох саха дьахтара Мария Христофорова.
