Бүгүн, балаҕан ыйын 8 күнүгэр, Арассыйа үрдүнэн биир кэлим куоластааһын күн иннинээҕи “чуумпу күн” саҕаланна. Дойду куоластыыр сокуонунан, бу күн быыбар иннинээҕи агитацияны ыытыы кыккыраччы бобуллар.
Сарсын, балаҕан ыйын 9 күнүгэр, РФ үрдүнэн 5 тыһ. араас таһымнаах быыбардар буолаллар. Ол иһигэр 26 эрэгийиэн баһылыктарын уонна 16 эрэгийиэннээҕи парламент дьокутааттарын талыахтара.
РФ 22 субъегар, ол иһигэр Саха сиригэр уонна Хакасияҕа, Алтаай, Приморье, Красноярскай уонна Хабаровскай кыраайдарга, Амыр, Владимир, Воронеж, Иваново, Кемерово, Магадаан, Москуба, Аллараа Новгород, Новосибирскай, Омскай, Орел, Псков, Самара уонна Тюмень уобаластарыгар, итиэннэ Москубаҕа уонна Чукотка автономиялаах уокуругар толорор былаас үрдүкү дуоһунастаах сирэйдэрин быһаччы талыахтара. Оттон Дагестааҥҥа, Ингушетияҕа, Ямал-Ненец автономиялаах уокуругар баһылыктарын парламеҥҥа талыахтара.
16 субъекка, чуолаан, Башкирияҕа, Бурятияҕа, Калмыкияҕа, Саха сиригэр, Хакасияҕа, Забайкалье кыраайыгар, итиэннэ Архангельская, Владимирскай, Ивановскай, Иркутскай, Кемерово, Ростовскай, Смоленскай, Ульяновскай уона Ярославскай уобаластарыгар уонна Ненец автономиялаах уокуругар эрэгийиэннээҕи парламент быыбардара буолаллар.
Маны таһынан, 4 эрэгийиэн киин куораттарыгар – Дьокуускайга, Абакаҥҥа, Хабаровскайга уонна Томскайга мээри талыахтара.
7-с ыҥыырыылаах Госдума мунньаҕар дьокутааттары эбии талыы сэттэ биир мандааттаах уокуруктарга – Амырга, Калининград, Аллараа Новогород, Самара, Саратов (икки биир мандааттаах уокурукка) уонна Тверь уобаластарыгар талыахтара.
Бу иннинэ РФ Киин быыбардыыр хамыыһыйата бэлиэтээбитинэн, сарсыҥҥы быыбарга 80 эрэгийиэҥҥэ 63 мөл. быыбардааччы кыттыаҕа.
