Саха Өрөспүүбүлүкэтин Ил Дарханын быыбарыгар миигин өйөөбүт уонна атын хандьыдааттарга куоластарын биэрбит дьоҥҥо ис сүрэхпиттэн махтанабын. Төһө да айылҕа уустук усулуобуйаны үөскэтэн, үгүс улууска хаар уонна ардах түспүтүн үрдүнэн, Саха сирин Киин быыбардыыр хамыыһыйатын барыллаан чахчытынан, өрөспүүбүлүкэ үрдүнэн быыбарга тахсыы 51,1 %-ҥа тэҥнэстэ. Бу – Саха сирин олохтоохторун көхтөөх буолууларын, өрөспүүбүлүкэ олохтоохторо тус бэйэлэрэ Саха сирин дьылҕатыгар сабыдыаллыахтарын баҕаралларын туоһулуур.
Доҕоттор! Бу ыйдарга биһиги үгүһү оҥордубут: күүстээх халаан кэнниттэн кыстыкка бэлэмнэнэр кыахтанныбыт, өрөспүүбүлүкэҕэ хас эмэ сыл мунньуллубут тыын кыһалҕалары быһаарыыга федеральнай өйөбүлү туһанныбыт. Бу ыйдарга мин Саха сирин үгүс улууһугар сырыттым, салалтаны уонна бары бөдөҥ бырамыысыланнай хампаанньалар салалталарын уонна кэлэктииптэрин кытта көрүстүм. Куораттар уонна сэлиэнньэлэр тыһыынчанан олохтоохторун, урбаанньыттары, тыа хаһаайыстыбатын, үөрэхтээһин, доруобуйа харыстабылын, култуура үлэһиттэрин кытта кэпсэттим. Барытыгар олоҕу тупсаҕай оҥоруохтарын баҕалаах, үлэлиири сатыыр, инникигэ бигэ эрэллээх дьону көрүстүм. Бу кэмҥэ араас хайысхаҕа үгүс сонун санаа уонна этии киирдэ. Эһигинниин бииргэ Саха сирин улуустарын уонна өрөспүүбүлүкэ бүттүүнүн стратегиялаах сайдыытын тумус тутуллар соруктарын чопчулаатытыбыт.
Бүгүн Саха сирэ сайдыы саҥа түһүмэҕэр турарын бары билэбит. Сөпкө таллыбыт. Мантан өрөспүүбүлүкэбит кэлэр кэскилэ уонна хас биирдиибит инники олоҕо тутулуктаах.
Буолан ааспыт быыбардар суолталарынан уонна киэҥ хабааннаахтарынан уратылаахтар: өрөспүүбүлүкэ Ил Дархана, өрөспүүбүлүкэтээҕи парламент саҥа састааба, киин куорат мээрэ уонна Дьокуускай куорат Дууматын дьокутааттара, 15 улуус уонна 20 нэһилиэк баһылыга, оройуоннааҕы Сэбиэт 22 уонна нэһилиэктэр бэрэстэбиитэллээх уорганнарын 7 дьокутаата талылыннылар. Бары уопсай сыалбытын ситиһиигэ – Саха сирэ аныгылыы көрүҥнээх, баай-талым олохтоох уонна чэчирии сайдарын туһугар түмсэн, бары бииргэ үлэлиэхпит диэн эрэнэбин. Биһиги кэлэр кэскилбитин көрүөхтээхпит, үтүө түмүктэри ситиһиигэ, хас биирдии Саха сирин олохтооҕо байылыаттык уонна дьоллоохтук олорорун туһугар үлэлиэхтээхпит.
Бу соруктары быһаарыы сомоҕолоһуута, Саха сирин олохтоохторун барыларын түмүүтэ суох кыаллыбат. Өйөбүлгүт иһин махтанабын!
