КПРФ баартыйатыттан дойду бэрэсидьиэнин быыбарыгар турбут Павел Грудинин Саха сирин быыбардааччытын 27,25% куолаһын ылбыт. Бу – Арассыыйаҕа саамай үрдүк көрдөрүү.
Грудинин маны таһынан элбэх куолаһы Хабаровскай кыраайыгар (18,42%), Амыр уобалаһыгар (18,62%) уонна Еврей автономнай уокуругар (18,12%) ылбыт. Инньэ гынан, Владимир Путин Уһук Илиҥҥэ саамай кыра көрдөрүүнү ылбыт.
Владимир Путиҥҥа 294 166 Саха сирин олохтооҕо куоластаабыт (64,38 %). Путиҥҥа саамай көхтөөхтүк Кабардино-Балкария – 93,49%,Тыва — 92,19%, Дагестан — 91,11% уонна Севастополь — 90,31% куоластаабыттар.
Москуба бириэмэтинэн сарсыарда 4 чааска дойду быыбардааччыларын 97,05% куолаһа ааҕыллыбыт. Ол түмүгүнэн, Владимир Путин – 76,6%, Павел Грудинин — 11,87%, Владимир Жириновскай — 5,73%, Ксения Собчак — 1,64%, Григорий Явлинскай — 1,02%, Борис Титов — 0,75%, Максим Сурайкин — 0,68%, Сергей Бабурин — 0,65% куолаһы ылбыттара биллибит.
