Киирии

Киирии

Бу дьыл балаҕан ыйыгар буолуохтаах Ил Түмэн быыбарыгар “Биир ньыгыл Арассыыйа” баартыйаттан бастыҥтан бастыҥнары талар барыллаан быыбарга (праймериз) Прокопьев Владимир Михайловиһы өйүүргүтүгэр ыҥырабын!

Владимир Михайлович үлэтин Чаппанда отделениетын оробуочайыттан саҕалаабыт, салайар үлэ бары кэрдиистэрин тус бэйэтин дьулуурунан, өйүнэн-санаатынан, туруу үлэтинэн дабайбыт улахан уопуттаах салайааччы, уопсастыбаннай уонна бэлитиичэскэй диэйэтэл буолар.

Кини курдук киэҥ билиилээх салайааччы аҕыйах диэххэ наада — Ил Түмэн икки болдьоҕор депутатынан, ону кытта ситэриилээх былааска миниистир бастакы солбуйааччытынан, улуус баһылыгынан үлэлээбит, тыа сирин бары кыһалҕаларын, промышленность эгэлгэлэрин, бэрэстэбиитэллээх, сокуону оҥорор былаас бары муударастарын, ситэриилээх былаас бары силигин этинэн-хаанынан, өйүнэн-санаатынан билбит, Ньурба улууһун уонна Саха сирин дьиҥнээх патриота!

Ону кытта кини биир саамай үчүгэй хаачыстыбатын бэлиэтиир наада — киһи быһыытынан боростуой, сахалыы-махалыы, көнө, элэккэй майгытын. Ханна да тиий, кимтэн да ыйыт — тойон-хотун буоллун, үлэһит дьон буоллуннар, Владимир Михайлович туһунан куһаҕаннык саҥарар киһини булуоҥ суоҕа. Бу республика парламенын депутатыгар, ол эбэтэр дьон-сэргэ былааска бэрэстэбиитэлигэр саамай наадалаах хаачыстыба дии саныыбын.

Парламент үлэтигэр уопута, билиитэ-көрүүтэ улахан. Ил Түмэн аҥаардас бу болдьоҕор 37 сокуон барылын ааптара буолар. Ону таһынан сокуоннар барылларын Арассыыйа таһымыгар көҕүлүүр, Федеральнай Мунньах икки палататынан туруорсар аҕыйах депутаттартан биирдэстэрэ — Владимир Михайлович! Аҥаардас “Уһук Илин гектарын” туһунан федеральнай сокуоҥҥа көннөрүүлэри, “Ирбэт тоҥу харыстааһын туһунан” федеральнай сокуон барылын туруорсууларын санааҥ! Кинини Госдумаҕа, Федерация Сэбиэтигэр бары билэллэр, аахсаллар уонна дириҥник убаастыыллар. Биир дойдулаахтара, Ньурба улууһун олохтоохторо, сүбэҕэ-амаҕа, көмөҕө наадыйан кэллэхтэринэ күүһэ, кыаҕа тиийэринэн куруук өйүүр, көмөлөһөр.

Онон биир дойдулаахтарбын ыҥырабын: муус устар 15 күнүгэр барыллаан куоластааһыҥҥа Ньурба уонна Саха сирин патриота Прокопьев Владимир Михайлович иһин куоластааҥ!

Мария Христофорова,

СӨ култууратын туйгуна,

СӨ ыччат бэлиитикэтин туйгуна, Арассыыйа бастыҥ медиа-менеджерэ,

“Ситим” медиа-бөлөх генеральнай дириэктэрэ.

Тарҕат:

Ырытыыгын суруй

Защитный код
Обновить

Бүтэһик сонуннар