Войти

Войти

Мииринэй оройуонугар эбэҥкилэр түөлбэлээн олорор Сүлдьүкээр сэлиэнньэтигэр Булчут күнүн бэлиэтээтилэр.

Манна оройуон булчуттарын күрэхтэһиилэрэ буолан ааста.
Кыттыыны ыллылар: Таас-Үрэхтэн - "Ботуобуйа",  Арыылаахтан ("Новай" сопхуос) - "Чуона", Сүлдьүкээртэн -" Куохаан"," Сордоҥноох" төрүт-уус общиналара уонна Мииринэй куоратын хамаандата.
Күнэ да чэмэлкэй, халлаана да ыраас буолан, тэрээһин бэрт сэргэхтик ааста. 
Ыалдьыттары эбэҥкилэр былыргы үгэстэринэн, дьону араҥаччылыыр күрүө - чичипкаан нөҥүө ыыталаан, араас дьайтан, мөкүттэн ыраастаатылар.Таба хобочоонун тыаһа лыҥкынаата, брангат омуктар "Икэллу" эҕэрдэлэрэ сатараата. Алгысчыт - Уйбаан Неустроев Аал-уокка арыылаах алаадьыны бэлэх уунан, күн сирин дьонугар бары үтүө эрэ буоларын туһугар, хоҥкуйан туран көрдөстө.Сүлдьүкээрдэр туох да сиэдэрэй, үҥкүүлээх-битиилээх, ырыалаах-тойуктаах, дьэрэкээн эбэҥки таҥастара быыстапкалаах, дэлэй сандалылаах бырааһынньыгы тэрийбиттэр.
Олохтоохтор хотугу дьон сиэринэн, ыалдьыттары улар, кус-хаас, таба этинэн, арыылаах алаадьынан, тайҕа аатырбыт лэппиэскэлэринэн, итии чэйинэн күндүлээтилэр. Дьиэлэригэр илдьэллэригэр анаан кэһии бэлэмнээтилэр.
Бырааһынньык дьоно, дьэбэйдэлээн дьиэрэстилэр, мончуор-оһуорай эбэҥки эрчимнээх дьуохардарыгар эргийдилэр.
Сүрдээх көрдөөх бырааһынньык сүрүн көрүҥүнэн булчуттар күрэстэрэ буолла.
Күрэхтэһээччилэр сыыдамнык мас хайытааһынтан саҕалаан хамаанданан хомуур хапсаҕайга тиийэ, күүстэрин холоннулар.
Түмүк таһаарыллыбытынан, Булчут күрэҕэр, Мииринэй куорат хамаандата бастаата. Иккис миэстэ - "Куохаан" төрүт-уус община(Сүлдьүкээр).
Үһүс миэстэни эмиэ Сүлдьүкээртэн "Сордоҥноох" төрүт-уус община ылла.
Бары да хамаандалар кыайар-хотор туһугар дьаныардаахтык кииристилэр.
Дьэ ити курдук, Булчут Күнэ Сүлдьүкээргэ олус көхтөөхтүк, көрдөөхтүк ыытыллан, дьон-норуот санаатын сүрдээҕин диэн манньытта.

Станислав Алексеев, Мииринэй куората.

Валентина Спиридонова(Сүлдьүкээр) хаартыскалара.

Тарҕат:

Добавить комментарий