Хой
Инники былааны торумнуурга тоҕоостоох күннэр үүммүттэр. Настарыанньаҥ үчүгэй. Ол эрээри, арыый холкутуйан, иннигин-кэннигин үчүгэйдик быһаарынарыҥ ордук. Өскөтүн сулумах, эрэ-ойоҕо суох буоллаххына, истиҥ кэпсэтии күүтэр. Бу нэдиэлэҕэ иэс-күүс төннөрүүтэ буолуоҕа. Эйигиттэн иэс ылбыттар төлөһүөхтэрэ, үп-харчы киирэн барыаҕа.
Оҕус
Үлэ таһаарыылаах, барыта сатанан иһэр. Хата, чугас дьоҥҥун кытта сыһыаны тупсарарга күүскэ үлэлэс. Сулустар дьиэ кэргэҥҥин кытта сыһыаҥҥын тупсараргар хаһааҥҥытааҕар да күүскэ көмөлөһүөхтэрэ. Өйдөспөт түгэн таҕыстаҕына, наһаа дириҥэтимэ, айманыма. Барыта этэҥҥэ буоллаҕына, нэдиэлэ түмүгэр кэлии-барыы, тапталлааххын кытта күүлэй күүтэр. Ол доруобуйаҕар, этиҥ-хааныҥ уопсай туругар туһалаах буолуо.
Игирэлэр
Үлэлиир кэлэктиипкэр эйигин ордук саныыр, күнүүлүүр киһи баар. Кини кимин билэҕин, кини аайы санааҕын түһэримэ. Ылсыбыт дьыалаҕыҥ тиһэҕэр тиэрдэргэ үөрэн. Кыһалҕа кыһыл кымньыылаах. Онон өтөрүнэн быһаарбакка сылдьар дьыалаларгын доҕотторуҥ көмөлөрүнэн быһаарыаҥ. Чугас дьоҥҥор ис санааҕын арыйатартан куттаныма. Тус олоҕун табыллар чинчилээх эрээри, аһара сэмэйгин, килбиккин уонна чиҥ-чаҥ быһаарыныыта суоххун.
Араак
Бу күннэргэ ньиэрбинэйдиир, кыраттан да кыыһыран тымтар турукка киириэҕиҥ. Ол иһин улахан эппиэттээх, суолталаах үлэни толорботуҥ ордук. Уопсайынан, бу нэдиэлэни тулуурдаах уонна дьулуурдаах буоллаххына эрэ улахан айдаана суох мүччү түһүөҕүҥ. Бэнидиэнньик, оптуорунньук ыарахан буолуо. Тапталлааххар кыыһырыма, кыйаханыма.
Хахай
Эрдэттэн түмүк оҥорума, билбиккин-көрбүккүн үчүгэйдик бэрэбиэркэлээ. Сорох ардыгар, төһө да ыарахан буолбутун иһин, куһаҕаны санаама. Билигин ис туругуҥ күүһүрэн сылдьар кэмэ. Ол аата, хайдах толкуйдуугун да, барыта оннук барыа. Өрөбүллэргэ соччо билбэт дьоҥҥун кытта алтыһыаҥ, кинилэргэ олоххун ыһа-тоҕо кэпсээмэ. Наһаа аһаҕас буоларыҥ сэрэхтээх.
Кыыс
Үрдүкү күүстэр эйиэхэ күүс-көмө буолаллар. Дьону кэнниттэн саҥара сылдьыбакка, тугу саныыргын сирэйигэр баллаччы этэ сылдьар буолбуккун. Ити хаачыстыба икки өрүттээх. Тылгын кыатана туттарыҥ ордук. Өйгүн-санааҕын сааһылаа, тылга киирсибэтэх киһигин кытта уопсай тылы була сатыырыҥ ордук буолуо. Өрөбүллэргэ успуордунан дьарыктан, тас көрүҥҥэр болҕомтоҕун уур.
Ыйааһын
Чугас киһигиттэн хомойо сылдьаҕын. Киһи араас буолар, дьонтон наһаа элбэҕи ирдээмэ, күүтүмэ. Чэппиэргэ уонна бээтинсэҕэ дьыаланы-куолуну бэлэмнииргэ табыгастаах буолуо. Үлэҥ -- таһаарылаах, дохуот киириитэ -- куһаҕана суох. Саамай сүрүнэ -- ханна да хойутаама. Нэдиэлэ ортотугар доҕоттору кытта көрсүһүү үлэҕэр мэһэйдиэҕэ.
Скорпион
Биисинэс партнердаргын кытта сэрэхтээхтик кэпсэт. Нэдиэлэ саҕаланыытыгар түргэн-тарҕан туттунуу абырыаҕа. Бу күннэргэ үчүгэй сонуну истэҥҥин, санааҥ улаханнык көтөҕүллүө, үлэлиир баҕаҥ улаатыа. Өрөбүллэри дьиэ кэргэҥҥин кытта атаар. Доруобуйаҥ туруга үчүгэй, түбэһиэх эми-тому иһимэ.
Охчут
Нэдиэлэ холкутук уонна ситиһиилээхтик ааһыаҕа. Эйигин кэрэхсии көрөр дьон ураты болҕомтолорун биллэрэн, бэйэҕэр эрэлгин хас да мутук улаатыннарыахтара. Чугас дьоҥҥор болҕомтолоох буол. Кинилэр эйигиттэн элбэҕи эрэйэллэр уонна эрэнэллэр. Дьон сүбэтин, кириитикэни истэ үөрэн. Кытаат.
Чубуку
Төрөппүттэриҥ уонна оҕолоруҥ эн сылаас, истиҥ сыһыаҥҥар олус наадыйаллар. Үлэҕэ баттатан, чугас дьоҥҥор болҕомтону уурбат буолбуккун. Тапталлаахын кытта оннук кыһалҕа эмиэ баар. Карьера чааһыгар -- дабайыы бөҕө. Биллэн турар, сыралаах үлэҥ сыаналанар. Оттон эн наһаа үлэһиккин. Ол эрээри, туох баар ситиһии барыта бөҕө туруктаах дьиэ кэргэҥҥэ тирэҕирэрин умнума.
Күрүлгэн
Профессионал быһыытынан үүммүккүн,сайдыбыккын. Сотору кэминэн, дуоһунаһыҥ лаппа үрдүүр чинчилээх. Арай, дьону кытта алтыһар, кэпсэтэр, өйдөһөр култуураҕар болҕомону уур. Ардыгар аһара бал-бааччы тыллаһан дьону өһүргэтэҕин. Дьиэҕин-уоккун үчүгэйдик көрө-харайа сырыт, ыраас-чэнчис буол.
Балыктар
Доруобуйаҕын көрүн. Ыарыыны олохсутума. Эйиэхэ күүс-көмө буолуон баҕалаахтары киэр кыйдаама, көмө көрдүүртэн кыбыстыма. Кыайбат, сатаабат дьыалаҕар ылсыма, наһаа элбэҕи бэйэҕэр ылыныма. Өрөбүллэр сэргэхтик ааһыахтара, доҕотторгун кытта көрсүһүү күүтэр.
