Хой
Тус олоххун кими да кытта ырытыма. Былааҥҥын дьоҥҥо ыһа-тоҕо кэпсээмэ. Өрөбүллэргэ олус үчүгэй тэрээһиҥҥэ кыттан улахан дуоһуйууну ылыаҥ. Соҕотохсуйбут хойдор сүрэххит аҥаарын көхтөөхтүк көрдүүгүт. Таптал эмискэ кэлиэҕэ, ону өйдөө. Эр дьоҥҥо оҕону кытта сыһыан уустук буолбут. Уопсайынан, дьиэ кэргэни кытта сыһыаны тупсарарга өйгүн-санааҕын уурарын суолталаах.
Оҕус
Кэллиэгэлэрин ортолоругар эйиэхэ күнүүлүүр кэрэ аҥаар баар. Хас биирдии хардыыгын кэтээн көрө сылдьар. Чугас дьонуҥ санааларын учуоттаа, сөптөөх быһаарыыны ылыныах тустааххын. Сулумахтар урут ыал буола сылдьыбыт киһини кытта сибээстэһэргит наадата суох. Бу күннэргэ ис санааү туолар кыаҕа күүстээх. Онон үчүгэйи ыраҥалаа. Ыал оҕустар аймахтаргытын кытары өйдөспөт буолуу үөскүөҕэ.
Игирэлэр
Ханнык эрэ тыын кыһалҕаны быһаарар киһиттэн тутутлуктанаҕын. Холкутук сырыт, атын дьыалаҕа болҕомтоҕун уур. Маныха, үп-харчы кыһалҕата сытыырхайбыт курдук. Үлэҕин уларытар туһунан санаабытын ырааппыт эрээри, наһаа ыксаама. Кытаатан халыннык таҥна сырыт, тыалга үрдэриэххин сөп. Сөбүлүүр дьарыккын сайыннар, үтүө түмүк күүтэр. Санааҕын сааһылаан, массыыналаах буоллаххына, элбэхтик айаннаа, сатыы хаам.
Араак
Чугас доҕорун ыалдьыттата ыҥырыаҕа. Онно туох эрэ үөрүүлээх түгэн күүтэр. Ордук кэрэ аҥаардар табыллыахтара. Аҕа саастаах араактар дьиэ-уот үлэтин кыайа-хото тутуохтара. Тыл барда – бас барда дииллэр. Бу күннэргэ тыл олус суолталаах. Мээнэ саҥарыма, дьону өһүргэтимэ. Киэһэлэри чуумпутук атаар. Өрөбүллэр хаһааҥҥытааҕар да көхтөөхтүк ааһыахтара. Кылгас айан күүтэр. Доруобуйа этэҥҥэ.
Хахай
Олоххо көрүүҥ уларыйан иһэр. Уһуну-киэҥи толкуйдуур буолбуккун. Бу соторутааҕыта билсибит киһиҥ ураты болҕомтону ууран соһутуоҕа. Салгыы сыһыан хайдах буолара эйигиттэн тутулуктаах. Өйдүүр, эн санааҕын учуоттуур, санаа атастаһар дьону кытта алтыс. Бэйэ дьыалата дохуот киллэрбэт буолбут. Үлэттэн сылайбыт буоллаххына, сынньана түһэр кэм кэлбит. Бу күннэргэ түүһээбит түүлүн өтөрүнэн туолуоҕа.
Кыыс
Үлэ этэҥҥэ, дохуот үрдээн иһэр. Саҥа бырайыагы көмүскүүргэ, саҥа саҕахтары арыйарга табыгастаах кэм. Айар куттаахтар үлэ үгэнигэр сылдьаҕыт, айар-тутар дьоҕургут ыһылла сылдьар.Кириитикэлэннэххинэ наһаа санаархаама, бэйэҕэр тутума. Ыалдьан хаалыаҥ. Маныаха, суолга-иискэ сэрэхтээх буол. Суолтан тутан билбэт киһигэр, массыынаҕа олорсума, кэпсэтимэ. Таптал чааһыгар халбаннааһын суох.
Ыйааһын
Сөбүлээбэт дьыалаҕынан дьарыктанаҕын, санааҕа-онооҕо ылларан сылдьаҕын. Тус санааҕын дьоҥҥо этэ үөрэниэххин наада. Олоххор уларытыыны киллэриэххин санаатаххына, өр толкуйданыма. Чугас киһиҥ сыыһа-халты туттуутун бырастыы гын, дириҥэтимэ. Доҕотторгун кытта сыһыаны тупсарарга эмиэ кытаат. Бу күннэргэ сөбүлүүр аскын аһаа, саҥа киинэҕэ сырыт, муодунайдык таҥнан бэйэ бодотун тупсар. Санааҥ чэпчиэ.
Скорпион
Тус олоххор сыһыаннаах дьикти этии кириэҕэ. Арааһа, ол көннөрү үлүһүйүүнү кытта ситимнээх буолуон сөп. Кэллиэгэлэригин кытта сыһыан биллэ тупсубут. Саамай кылаабынайа үлэни кытта тус олоҕу дьүөрэлээ. Таптал чааһа күлүккэ хаалан хаалбатын курдук. Доруобуйаны тупсарарга, дьиэ кэргэни кытта бириэмэ атаарарга олус табыгастаах күннэр. Настарыанньаҥ түстэҕинэ кыра оҕолору кытта алтыс.
Охчут
Үлэ көрдүү сылдьааччыларга ыарахан буолуоҕа. Дьиэҕэ тууйуллан сыппакка, элбэхтик салгыҥҥа сырыт. Саҥа билсиини-көрсүүнү олохтуурга ордук табыллыаҥ. Биир интэристээх дьону кытта алтыһан, санааҥ чэпчиэ. Сокуон үлэһиттэрин кытта аахсыы тахсыан сөп. Онон быраап хачайдыырга оттомноох буол. Таптал чааһа олус истиҥ. Соһуччу бэлэх тутан дьоллонуоҥ. Сөбүлүүр ырыаһытын кэнсиэригэр барар чиэскэ тиксиэҥ.
Чубуку
Сэниэ суох курдук. Үгүстэргэ дьаҥ киирээри гыммыт. Карьера чааһыгар уларыйыы күүтэр. Бэйэҕэ үлэлиир чубукулар аһара эстиэххитигэр диэри үлэҕэ үлүһүйүмэҥ. Саамай санааны ыраастыыр түгэнинэн тапталлаах киһигин кытта бириэмэ атаарыы буолуоҕа. Ыаллар кэккэҕитин хаҥатаргытыгар кыах бөҕө баар. Нэдиэлэ бастакы аҥаарыгар доруобуйаҕа эчэйиилээх түгэн тахсыан сөп. Дьоҥҥо иэскэ кииримэ уонна иэс биэримэ. Харчыттан сылтаан доҕотторгун кытта өйдөспөт түгэн буолуон сөп.
Күрүлгэн
Сынньалаҥ күннэр күүтэллэр. Аһара көхтөөх олоххун тохтото тус. Доруобуйа, тас көстүү чааһыгар болҕомто уурар наадалаах. Аһыыр аскар болҕомтолоох буол. Атын сиргэ көһөн барааччылары ситиһии күүтэр. Бу нэдиэлэҕэ буолар быһыы-майгы эн олоххо сыһыаҥҥын көрдөрүөҕэ. Кэргэҥҥин, тапталлааххын кытта сыһыаҥҥа саҥа таһымҥа тахсыахха наада. Саамай ситиһиилээх күннэринэн нэдиэлэ иккис аҥаара буолуоҕа.
Балыктар
Таптал чааһыгар мэлийэр кутталлааххын. Хараххынан сөбүлүү көрөр киһиҥ эпиэтэ суох- сыһыаныттан, улаханнык хомойуоҥ. Биир киһинэн олох бүппэт, инникитин умнуллбат, чаҕылхай күннэр күүтэллэр. Карьера чааһыгар охтооччулары кыайыы күүтэр. Эбии дохуот киирэ турар. Күннээҕи олоххор успуорду киллэрдэххинэ, өссө үчүгэй буолуо этэ. Доруобуйаҥ туруга онно эппиэттэһэр. Ыал балыктарга өйдөспөт түгэн үөскээбит.
