“Кыым” хаһыат 2017 сыллааҕы тохсунньу 26 күнүгэр “Угаайылаах уурдарыылар” диэн матырыйаалы бэчээттээбитэ. Онно Бэрдьигэстээхтэн биир ааҕааччы “хайдах буоларбытын билбэппит, түөкүттэр мүөттээх тылларын итэҕэйэн, уурунуу харчыбытыттан ытыс соттон хааллыбыт” диэн, чахчы ыксаабыт киһи эрийэ сылдьыбытын ылсан, Саха сиригэр баар саарбах уурдарыыларынан угуйар тэрилтэлэрин туһунан суруллубута. Кистэл буолбатах, ол-бу саарбах соҕус кирэдьиит тэрилтэлэрэ эрэкэлээмэҕэ үлүгэр үбү харыһыйбакка “биһиги көмөбүтүнэн харчыгытын хаҥатыҥ, ыыра байыҥ” диэн, чахчы, киһи эрэ ымсыырыах ыҥырыылары таһааран баран, сабыллан хаалалллар. Биллэн турар, дьон үбүн куорҕаллаан сиэн баран.
Аҕыйах хонуктааҕыта Бэрдьигэстээхтэн үлүгэр үптэриттэн ытыс соттон хаалбыт Решетниковтар матырыйаал ааптарыгар аадырыстаан сурук ыыппыттар. Ону хайдах баарынан таһаарабыт.
"Эһиги 2017 с. тохсунньу 26 күнкгэр дьону албыннаабыт кирэдьиит тэрилтэлэрин туһунан улахан ыстатыйаны үчүгэйдик, сиһилии суруйан таһаарбыккыт дии. Ол иһигэр МФО “АартыкЭкспрессКредит” диэн тэрилтэ туһунан. Биһиги албыннаппыт уурдарыылаахтар суутунан кыайан баран туга да суох хааллыбыт. Ити тэрилтэ дириэктэринэн үлэлээбит Лилия Кимовна Иванова туох да эппиэккэ тардыллыбыта биллибэт. Эстиэхтэрин иннинэ бүтэһик көрсүһүүгэ “харчылаах буоллаххытына төһө баҕарар сууттаһыҥ, син биир тугу да туһаныаххыт суоҕа” диэбитэ кырдьык буолан таҕыста. Үгүстэр биэнсийэлээх кырдьаҕас дьон, бука “аахсыбаттар, өлөн-сүтэн бүтүөхтэрэ” диэбитэ буолуо. Ол да курдук буолан эрэр. Улуус бочуоттаах олохтооҕо, ССРС судаарыстыбаннай бириэмийэтин лауреата, Үлэ Албан аатын 2-с, 3-с истиэпэннээх уордьаннарын кавалера, СӨ норуотун хаһаайыстыбатын үтүөлээх үлэһитэ, үйэтин тухары араас тиэхиньикэҕэ суоппардаабыт, ССРС ыһыллыбатаҕа буоллар Герой аатын ылыахтааҕа хаалбыт, ол да буоллар “Герой Яковлев” диэн аатынан биллэр ытык киһи – Д.И. Яковлев суорума суолланна. Кини бу олохтон улаханнык хомойон, кэлэйэн барда. Үйэлээх сааһын тухары хара илиитинэн муспут харчытын уурдаран баран, кыайан ылаахтаабата. Бүтэһигэр диэри ыйыталаһа, сураһа сылдьыбыта. Оҕолоругар, сиэннэригэр көмөлөһөөрү гыммыта табыллыбатаҕыттан абаран да хайыаҕай...
Бу туох ааттаах сокуоннаах дойдуга олоробутуй? Сорох кыра-хара киһи кып-кыраҕа сууттанан хас эмэ сылга хаайыыга барар буоллаҕына, сорох төһө эмэ мөлүйүөнүнэн “кыбан” баран туох да буолбатаҕын курдук таах сылдьар. Сурах хоту иһиттэххэ, ити Л.К.Иванова бу да иннинэ соччо “ыраас” буолбатах үһү. Маннык киһини хайдах тэрилтэ салайааччытынан анаабыттара буолла? Ол бу бэрэбиэркэлиир, дьарайар уорганнар балай эмэ курдуктар да, тугу да сүгүн-саҕын быһааран испэттэр. Нолуок уорганнарыгар иэс бөҕөлөөх диэн счетун тутан ылбыттар этэ. Аны биир албыннаппыт уурдарыылаах бириистэптэртэн ыйыппытыгар “аатын уларыппыт, ханна эрэ күрээбит дуу, саһа сылдьар дуу” диэбиттэр. Бүтэһигэр “АартыкЭкспрессКредит” моҥкуруукка баран сабылынна, инньэ гынан бириистэптэртэн итиэннэ ыйыталаһымаҥ диэн буолла. Дьэ бу хайдаҕый? Тоҕо холуобунай дьыала тэрийбэтилэр? Билигин да кирэдьииттээх дьонтон иэстэрин ким ыла олороруй? Истэ-билэ сылдьарбытынан, кэллиэктэрдэринэн эҥин куттаан дьонтон иэстэрин каартаҕа ыыттараллар эбит. Уопсайынан, дьыала иһэ туох да хааһы курдук.
Тустаах уорганнар, быраабы араҥаччылааччылар бу дьыаланы туох диэн быһаараллара буолла? Ама, үлүгэр дьону албыннаан баран ким да эппиэккэ тардыллыбата буолуо дуо? Түөкүн дьон туһунан өссө да суруйа туруҥ. Дьон-сэргэ биллиннэр." Николай Михайлович Бэрдьигэстээх.
Лилия Иванова Инстаграмҥа сирэйиттэн көрдөххө, ханна эрэ соҕуруу дойдуга сынньананан дуоһуйар
