Балаҕан ыйын 2 күнүгэр Поклоннай хайаҕа үгэс курдук сыл ахсын ыытыллар Пресса бэстибээлэ буолан ааста. Быйыл тэрээһин «Москубатааҕы медиа-бэстибээл» диэн саҥа ааттанна.
Бэстибээл Арассыыйа киин куоратын биир бэлиэ тэрээһинин быһыытынан 20 сыл устата ыытыллан кэллэ. Аныгы олох ирдэбилинэн быйыл болҕомтону, бэчээттэнэр таһаарыыларга эрэ буолбакка, медиа атын көрүҥнэригэр - онлайн-платформаларга, блогиҥҥа уонна тэлэбиидэнньэҕэ уурдулар. Урут манна федеральнай уонна москубатааҕы эрэ тэрилтэлэр кыттар буоллахтарына, быйыл АРС-ПРЕСС иһигэр киирэр регионнааҕы хаһыаттар уонна кинигэ кыһаларын салайааччылара кытыннылар. Ол курдук, павильоҥҥа Уһук Илиҥҥи федеральнай уокуруктан Сахалин уобалаһа уонна Саха сириттэн «Ситим» медиа-бөлөх бэйэлэрин таһаарыыларын көрдөрдүлэр.
Бэстибээлгэ маастар-кылаастар, биллиилээх дьону кытта көрсүһүүлэр, төгүрүк остуоллар ыытылыннылар. Бэчээттэнэр таһаарыылары атыылыыр киоскалар кыһалҕаларын кэпсэтиигэ хас даҕаны былаһаакканы анаатылар. «Ситим» медиа-бөлөх генеральнай дириэктэрин солбуйааччыта Андрей Шилов Дьокуускайга хаһыаты, сурунаалы атыылыыр киоскалары, дьон сөбүлээн сылдьарын үрдүнэн турар сирин былдьаан, куорат кырыытыгар көһөрөн кэбиһэр түбэлтэлэрэ элбэҕин эттэ.
Оттон Москубаҕа, Воронежка, Липецкайга төттөрүтүн маннык киоскалары аныгылыы саҥардан, тупсаран, элбэх дьон сылдьар сиригэр туруорарга кыһаллаллар эбит.
«Yakutia 24» ситим матырыйаалынан бэйэ кэр.