Быыбар бүппүтэ хас да хонно. Ол эрээри норуот кэтэспит хандьыдаата Иннокентий Макаров Ил Түмэҥҥэ тоҕо кыайан ааспатаҕын ырытыы тохтообот. Госдума дьокутаата Сөдүөт Тумууһап, саха биир тумус туттар киһитин өйөөбөккө, Үөһээ Бүлүүтээҕи-Куорунайдааҕы быыбардыыр уокуруктан быраатын Сөдүөт Билиикэби Ил Түмэҥҥэ киллэрбитин сүөргүлүүллэр.
«Норуотугар чахчы кыһаллара буоллар, Киэсэни таһаарыахтаах этэ. Биһиги испииһэккэ кини баарын эрэ иһин Сиэрдээхтэргэ куоластаабыппыт» диэн кыһыйан-абаран бүппэттэр. Өйүүр бөлөх оргуйан олорор. Ол быыһыгар «Убайбытын туһаннахтара эрэ дии, СРЗП куолас эрэ хайытар партия, Тумусов аймахтарын эрэ депутат оҥорор, Онон туһата суох партия, хармааннарыгар эрэ үлэлиир дьон быһыылаах» диэн курдук хаҕыс саҥа-иҥэ элбэх.
Онуоха, баартыйа регионнааҕы салаатыгар бу Сөдүөт Тумууһаптан тутулуга суоҕун, барыта куолас ахсааныттан тутулуктааҕын быһаардылар. Ол эбэтэр, Иннокентий Федорович Ил Түмэҥҥэ «Сиэрдээх Арассыыйа» (СРЗП) баартыйа испииһэгинэн Дьокуускай куорат 11 №-дээх Пригороднай быыбардыыр уокуругуттан хандьыдаатынан турбута. Быыбар түмүгүнэн кини, 567 эрэ куолаһы ылан, баартыйа мандаты түҥэтэр испииһэгэр 28-с эрэ миэстэҕэ сылдьар диэн. Оттон Сөдүөт Билиикэп, 1949 куолаһы ылан Алдан кэнниттэн иккис миэстэҕэ тахсан, 1 мандакка тиксибит. Онон, Макаров сүүрбэттэн тахса киһини көтөн хайдах даҕаны мандакка тиксэр кыаҕа суох эбит.
Бүгүн Иннокентий Федоровичтан кыайтарыытын туһунан тугу саныырын ыйыттыбыт. Кини, буоларын курдук, аһаҕастык:
- Быыбар иннинээҕи аҕытаассыйабын үчүгэйдик ыыппатаҕым. Бииргэ үлэлээбит түмсүүлэрбин, дьоммун туһамматым. Дьиҥэр, барыта бэйэбиттэн тутулуктаах этэ, - диэн хоруйдаата.
Оттон биһиги санаабытыгар, киниэхэ өйөбүл, көмө буолуон сөптөөх биллэр-көстөр түмсүүлэр уонна бэйэтэ олорор Сатал түөлбэтин олохтоохторо өйөөбөтүлэр. Иннокентий Макаров соҕотоҕун, туох да өйөбүлэ суох сылдьан, итиччэ куолаһы ыла сатаабыт. Дьиҥэр, Саталлар Мархалары уонна Маҕаннары кытта күүстээх үлэ ыытан, бэйэ олохтооҕун Ил Түмэҥҥэ киллэрэргэ кыһаллыахтарын сөп этэ. Ону баара, тэллэй, отон, Таиланд, Турция уонна да атын мэһэйдээтэҕэ...
Бэйэ кэр.
