Балаҕан ыйын 17 күнүгэр Булгунньахтаахха «Картошка фест» бэстибээл чэрчитинэн Саха сирин бастакы «Аһаҕас уокка хортуосканы күргүөмүнэн ыһаарылааһын» рекорда олохтонно. Рекорду бигэргэтээччинэн «Ситим» медиа-бөлөххө киирэр «Ситим-Медиа» хампаанньа буолла. Бу рекордунан «Саха сирин рекордун кинигэтэ» саҥа өрөспүүбүлүкэтээҕи бырайыагы сүрэхтээтилэр. Тэрээһин быйыл биллэриллибэт Үлэ сылыгар ананна.
Кыттааччылар ыытааччы хамаандатынан хортуосканы хаҕылаан баран ыһаарылаан бардылар. Кинилэр барыта 100 кг хортуоскаттан 70 кг хортуосканы ыһаарылаан таһаардылар. Онтон 1 чаас ааспытын кэннэ «Саха сирин рекордун кинигэтин» эспиэрэ Егор Степанов рекорд түмүгүн бигэргэттэ. Манна барыта 168 киһи кыттыбыта билиннэ. Эспиэр рекорд олохтоммутун туһунан сэртипикээти «1-Малдьаҕар нэһилиэгэ» МТ баһылыга Айталина Васильеваҕа уонна «Хаҥалас улууһа» МТ баһылыга Олег Иринеевка туттарда.
Рекорду олохтооһун идеята нэһилиэк баһылыга Айталина Васильева, «Картошка фест» бэстибээл уонна нэһилиэккэ туризм хайдах сайдарын сырдатаары, «Ситим» медиа-бөлөх урукку салайааччыта Мария Христофороваҕа көрдөһүүлээх тиийбитигэр үөскээбит. Ол курдук, Гиннес уонна Арассыыйа рекордтарын олохтооһуҥҥа улахан уопуттаах «Ситим» медиа-бөлөх уонна «Кыым» хаһыат эрэдээксийэтэ Саха сирин аан бастакы рекордун аһаҕас уокка хортуосканы күргүөмүнэн ыһаарылааһыҥҥа олохтуурга этии киллэрбиттэр. Ол түмүгэр, ураты бэртээхэй тэрээһин ыытыллан, бар дьону сүргэтин көтөхтө, улахан сэҥээрини ылла. Рекорд олохтооһунун өрөспүүбүлүкэ уонна дойду элбэх сырдатар-иһитиннэрэр таһаарыыта суруйан тарҕатта.
«Билигин Саха сиригэр туризм күүскэ сайдар. Биһиги Өлүөнэбит туруук хайаларын, Буотаманы, Тукулааны элбэх киһи көрө кэлэр. Улууспутугар хас даҕаны турбаза тэриллэн үлэлиир. Маны таһынан, тэрээһин туризмын (событийнай) сайыннарар ирдэнэр. Ол иһин сылы быһа аһатар Булугунньахтаахпыт хортуоскатын киэҥ эйгэҕэ таһаарыахпытын баҕарбыппыт. Ол баҕабытын Мария Христофорова, «Ситим» медиа-бөлөх уонна «Кыым» көмөтүнэн толордубут. Ону ааһан, хортуоскабыт Саха сирин рекордун кинигэтигэр киирдэ, аата аар саарга аатырда.
Онон, Мария Николаевнаҕа уонна кини хамаандатыгар махталым муҥура суох! Нэһилиэкпитигэр уһуктуу тыына киирдэ! Сыралаах үлэҕит рекорд олохтооһуна эрэ буолбатах эбит - бу дьону түмүү, санааны бөҕөргөтүү, биир сутурук курдук оҥоруу! Мантан антах бииргэ таһаарыылаахтык үлэлиэхпит диэн эрэнэбин», - диэн Айталина Васильева үөрүүтүн үллэһиннэ уонна махтанна.
Сонун төрдө: Yakutia24
