Саха сиринээҕи ЗАГС управлениета Москубаҕа ыытыллар Норуоттар икки ардыларынааҕы «Арассыыйа» пуорум-быыстапка кэмигэр ыал буолуон баҕалаах уоллаах кыыһы көрдүүр. Ыал буолааччыларга уонна төрөппүттэригэр айан уонна гостиница ороскуотун төлүөхтэрэ, фотограбынан уонна видеограбынан хааччыйыахтара.
Быыстапка бу сыл сэтинньи 4 күнүттэн үүнэр сыл муус устар 12 күнүгэр диэри ыытыллар. Төрүт үгэһи тутуһуу элэмиэннээх ыал буолуу сиэрин-туомун регион күнүгэр - сэтинньи 12-гэр Норуот хаһаайыстыбатын ситиһиилэрин быыстапкатын (ВДНХ) уораҕайыгар оҥоруохтара.
Ыал буолааччылары сүүмэрдээһиҥҥэ бастакытын ыал буолар 35 диэри саастаах РФ гражданнара кыттыахтарын сөп. Маны сэргэ, кинилэр иккиэн эбэтэр биирдэстэрэ хайа эрэ эйгэҕэ ураты үтүөлээх, үрдүк ситиһиилээх, биитэр уопсастыбаннай үлэнэн көхтөөхтүк дьарыктаммыт, анал байыаннай дьайыыга кыттыбыт, быһата, Саха сирин киэн туттуута буолуохтаах.
Ыал буолааччылары көрдүүр биллэрии балаҕан ыйын 15 күнүгэр тахсыбыт. Бастакы сайаапкалар киирбиттэр. Муниципальнай оройуоннар уонна куорат уокуруктара сүүмэрдээһини бэйэлэрэ ыыталлар уонна ЗАГС управлениетыгар 1 паараҕа хадатаайыстыба ыыталлар эбит. Сайаапкалары балаҕан ыйын 25 күнүгэр диэри ылыахтара.
Сонун төрдө: СӨ Бырабыыталыстыбатын уонна Ил Дарханын пресс-сулууспата.
