Олунньу 14 күнүгэр Сунтаар улууһун култуураҕа управлениета уонна улуустааҕы киин библиотека "Ньургуһун"литературнай тумсүү дьоро күнүн тэрийэн ыыттылар. Бу күн улуус 8 ааптара 12 саҥа кинигэтэ сүрэхтэннэ:
Е.К. Львова-Долгууна уонна Айылҕа Уола - "Көмүс долгуннар", "Олох дьоло", "Көттөрбүөн ыҥырар алыпка"
З.И. Васильева-Сыралы "Санаам иэйиитэ", "Бэлэх"
Руслан Ксенофонтов - "Ыра санаам ырыа буолан"
В.П. Уарова - "Сырдык сулус буолан..."
В.Г. Дьячковская-Хара көмүс - "Күн уотун сылааһа", "Оо арай"
А.Алексеев - "Олоҕу хайдах баарынан"
Е.Антонова-Күн Сиккиэрэ - "Дьон айымньыларыгар санааларым", "Сибэкки ыһыаҕа"
Бу кинигэлэри "Офсет" тэрилтэ бэчээттээн ити күн буруолуу сылдьар кинигэлэри Дьокуускайтан аҕалбыт. "Офсет" генеральнай дириэктэрэ Дарья Скобелева, үлэһиттэрэ Алексей Скобелев, Галина Басылайканова "ньургуһуннардыын" көрсүһүү кэмигэр инникини торумнастылар уонна саҥа кинигэҕэ сакаас ыллылар.
Түмсүү салайааччыта Мария Кобельянова - Тускулаана сыл түмүктэрин иһитиннэрдэ, бары "ньургуһуннарга" туоһу сурук уонна түөскэ кэтэр анал бэлиэ туттарда. Түмсүү бэрэссэдээтэлин солбуйааччы Валентина Дьячковская инники былааннары билиһиннэрдэ. Олоҥхо дьиэтин дириэктэрэ Мария Тараярова литературнай суруйууга тылы, сурук бэлиэлэрин сөпкө туруорууга, уобарастааһыҥҥа иһитиннэрии оҥордо.
Бу күн төрөөбүт тыл уонна сурук-бичик декадатыгар аналлаах "Ийэ тылым-барҕа баайым" диэн хоһоон күрэҕигэр 21 үлэ киирбитин эспиэрдэр сыаналаатылар. Дьүүллүүр сүбэ бэрэссэдээтэлинэн СӨ суруйааччыларын союһун чилиэнэ Саргылаана Спиридонова-Кэрэмэс кийиитэ, эспиэрдэрдэринэн СӨ суруйааччыларын союһун чилиэннэрэ Николай Егоров, Анатолий Данилов, олохтоох суруйааччылар Трофим Егоров-Тирэҕэ, Елена Антонова-Күн Сиккиэрэ буоллулар. Түмүккэ 1 миэстэни Түбэйтэн Мария Данилова-Күн Мичээрэ, 2 миэстэни Сунтаартан Екатерина Коротова -Кэтии Лэчил, 3 миэстэни Сунтаартан Дина Николаева ыллылар.
Ити курдук Сунтаар "Ньургуһуннара" саҥа сылга саҥа кинигэлэри, саҥа ааттары арыйан саҥа үрдэллэргэ дабайаллар.
