Олунньу 13 күнүттэн АЛРОСА Үөһээ Муунатааҕы алмаастаах сиригэр Бүлүү умнаһын улуустарыттан үлэҕэ ыларга дьону хомуйан саҕалаата. СӨ нэһилиэнньэ дьарыктаах буолуутун судаарыстыбаннай кэмитиэтэ уонна Удачнайдааҕы ХБК үлэһиттэрэ Үөһээ Бүлүү, Бүлүү, Ньурба уонна Сунтаар улуустарын олохтоохторун кытары көрсөн үлэҕэ ылар туһунан кэпсэтиэхтэрэ.
Бэҕэһээ Сунтаар улууһугар баҕалаахтары сүүмэрдээтилэр. Бүгүн Ньурба улууһугар хомуйаллар. Сарсын дэлэгээссийэ Үөһээ Бүлүү сэл. сылдьыаҕа. Андреевскай, Кэнтик, Туобуйа нэһилиэктэриттэн үлэҕэ киириэн баҕалаахтар докумуоннарын улуус киинин кулуубугар илдьэллэр. Оттон Хоро, Дүллүкү, Хомустаах, Кырыкый, Далыр, Маҥаас, Боотулу, Оҥхой, Мэйик, Сургуулук олохтоохторо Хоро нэһилиэгин дьаһалтатыгар туттараллар. Нам, Ороһу, Тамалакаан, Харбалаах, Балаҕаннаах, Өргүөт, Быракаан олохтоохторо – Нам сэл. кулуубугар.
Дэлэгээссийэ салгыы Бүлүү улууһугар олунньу 16 күнүгэр үлэлиэҕэ. Баахта ньыматынан үлэлиэн баҕалаахтар докумуоннарын Бүлүү куоратыгар техникум дьиэтигэр туттараллар (куорат уонна чугастааҕы нэһилиэк олохтоохторо). Илбэҥэ, Лөкөчөөн, Дьөккөн, Бороҕон, Тыымпы, Тааһаҕар, Кыһыл Сыыр олохтоохторо Хампа сэл. дьаһалтатыгар туттараллар. Оттон Тыылгыны, Үгүлээт, 1-кы, 2-с Күүлэт, Балаҕаччы, Кыргыдай олохтоохторо – Халбаакы дьаһалтатыгар.
Ирдэниллэр докумуоннар: резюме, пааспар, үлэ киниискэтин уонна идэни үрдэтии дастабырыанньатын куоппуйалара. Докумуоннары күн бастакы аҥаарыгар – 9 ч. -13 ч. диэри туталлар.
“Олохтоох каадырдары – бырамыысалыннаска” бырайыак чэрчитинэн, Үөһээ Муунатааҕы алмаастаах сиргэ 598 саха дьонун үлэлэтэр сорук турар. Саҥа алмаастаах сири быйыл күһүн үлэлэтиэхтэрэ. АЛРОСА салайааччыта Сергей Иванов үөрүүлээх аһыллыыга Владимир Путины ыҥыран турар.
