Быйыл Аммаҕа улахан уу кэлэн улахан хоромньуну таһаарда, дьон олоҕун аймаата. Ыаллар дьиэлэрин-уоттарын, үгүс сылларга мунньуммут малларын биир күн иһигэр туора сотон ааста. Төһө да уу кэлэрин туһунан иһитиннэрии баарын үрдүнэн, маннык буолуо диэн ким да билбэтэҕэ. Ол иһигэр тыа хаһаайыстыбатын эйгэтигэр улууска үгүс хоромньуну, сүтүгү да оҥордо. Бааһына күрүөлэрэ, сайылыктар, ыаллар кыстык хотонноро, 10 ынах сүөһү, 20-н тахса сылгы ууга былдьанна. Төһө да үрдүк сиргэ эрдэ үүрүллүбүттэрин үрдүнэн киирэ тураллар, өссө элбэх сүтүк тахсыаҕын улуус дьоно-сэргэтэ салалтаны кытта түмсүүлээхтик бииргэ үлэлээбиттэрин түмүгэр элбэх сүөһү быыһанна.
Тахсыбыт хоромньуну оннугар түһэриигэ былааннаах үлэ саҕаланна. Тыа хаһаайыстыбатын салаатын үлэһиттэрэ мантан туора турбакка бэйэ-бэйэлэригэр көмөлөһө сылдьаллара дьон сүргэтин көтөхтө. «Амма» ТХПК правлениятын председателэ Черноградский Айысен Анатольевич 494 тыһ. солк. өҥөнү Чапчылҕан, Абаҕа, Сатаҕай, Амма-Наахара, Амма нэһилиэктэригэр олорор ууга барбыт үүт туттараччыларга хамыыһыйа түмүгүнэн көмөлөһөргө быһаарда.
Тыа хаһаайыстыбатын кооперативтара, улахан бааһынай хаһаайыстыбалар эмиэ туора турбакка көмөлөһөргө быһаарыннылар. Биир бастакынан, ыаллыы сытар улууспут Мэҥэ Хаҥалас «Тумул» кооператив бэрэссэдээтэлэ, Ил Дархан итэҕэллээх киһитэ Таисия Васильевна Десяткина икки төбө ынах сүөһүнү «Болугур» хаһаайыстыбатыгар аны күһүн биэрэр буолла. Улуустан «Илгэ» ХЭУо (бэрэссэдээтэл Тимофеев В.В.), Герой Лукин аатынан хаһаайыстыба (бэрэссэдэтэл Онуфриев В.С.), «Чараҥнаах» бааһынай хаһаайыстыба (баһылык Никитин В.А.), «Сэппэрээк» бааһынай хаһаайыстыба (баһылык Анисимов С.С.), «Галина» бааһынай хаһаайыстыба (баһылык Бубякина Г.И.), «Чолбон» бааһынай хаһаайыстыба (баһылык Иванова П.П.), «Сэргэ Бэс» бааһынай хаһаайыстыба (баһылык Фомин К.М.), «Араз» бааһынай хаһаайыстыба (баһылык Гардашов О.А-О) биирдии сүөһүнү сүтүктээхтэргэ биэрэргэ быһаарынныллар уонна «Фомин А.К.» бааһынай хаһаайыстыба 1,5 туонна хортуоппуйу биэрэн ууга барбыттарга көмөлөстө.
“Күндү дьоммутугар, ыарахан кэмҥэ күүс-көмө оҥорбуккутугар, киһилии аһыныгас сыһыаҥҥытыгар улаханнык махтанабыт. Баҕарабыт үлэҕитигэр үрдүк ситиһиини уонна чэгиэн-чэбдик доруобуйаны, дьоллоох олоҕу”, — диир Амма улууһун бааһынай хаһаайыстыбатын Ассоциациятын бэрэссэдээтэлэ, РФ үтүөлээх зоотехнига Александра Цыпандина.
