Дьокуускай куорат Автодорожнай уокуругун (баһ. А.А. Аргунов) баһылыгын солбуйааччы Иосиф Михайлович СЛЕПЦОВ уонна бэтэрээннэр Сэбиэттэрин бэрэссэдээтэлэ Галина Васильевна СИДОРОВА буолан, Улуу Кыайыы 75 сылын көрсө тэрээһин чэрчитинэн бүгүн, кулун тутар 17 күнүгэр, бу уокурукка олорор тыыл, үлэ бэтэрээнэ, Дьоруой Ийэ уордьан кавалера 94 саастаах Анна Ивановна ЯКОВЛЕВАҕа ыалдьыттаатылар.
Анна Ивановнаҕа Кыайыы 75 сылынан 3 мэтээли – Арассыыйа, СӨ уонна Дьокуускай куорат дьаһалтатын мэтээллэрин туттараннар, ытык кырдьаҕаһы үөртүлэр, долгуттулар. Кини 10 оҕолоох, 50-ча сиэннээх, хос сиэннэрдээх ытык кырдьаҕас. Бу уокурукка олорбута 20-тэн тахса сыл буолла. Ааспыт 2019 сыл атырдьах ыйыгар кырдьаҕастарга анаммыт “Өлүөнэ остуолбаларынан” круизка 3 күн астына айаннаан, күүлэйдээн кэлбитэ.
Анна Ивановна сэрии кэминээҕи эрэйдээх олоҕун маннык кэпсиир:
-- Сэрии буолуон хас да сыл иннинэ, аҕабыт муҥхалыы баран баран өлөн сыарҕаҕа тиэллэн кэлбитэ. Биһиги оҕолор ытаһыы-соҥоһуу, аймалҕан бөҕө буоллубут. Онон аны 5 оҕо төгүрүк тулаайах туох да көмүскэлэ, харысхала суох хааллыбыт.
Оо, ыарахан да кэмнэр этилэр! Оҕолор буоллахпыт кимиэхэ да үҥсэргээбэппит, кимтэн да көрдөспөппүт. Эдьиийим хас саастааҕа буолла, биһигини иитээри оскуолаттан уурайан, сүөһү көрүүтүгэр үлэлии барда. Эдьиийбит барахсаны ийэ-аҕа оҥостон, 4 оҕо син инчэҕэй тирбэҕэ быстыбатынан олордубут. Кини холкуос үлэһитэ буолан кыра үүт, бурдук оҕото бэрсэннэр син хоргуйан өлбөккө сылдьаахтаатыбыт.
1941 сыллааҕы Аан дойдуну атыйахтаах уулуу аймаабыт Аҕа дойду сэриитэ саҕаламмытын, дьон-сэргэ айманыытын субу баардыы өйдүүбүн. Сэрии бастакы ыйдарыгар дьахталлар кэргэттэрин, уолаттарын сэриигэ атаарар аймалҕаннара, ытабыллара-соҥобуллара – барыта харахпар хатанан хаалбыттар.
* * *
Дьокуускай куорат Автодорожнай уокуругар 2 Аҕа дойду улуу сэриитин кыттыылааҕа, 176 тыыл бэтэрээнэ, 424 сэрии тулаайахтара бааллар. Кыайыы мэтээллэрин туттарыы бу уокурукка олунньу ыйтан саҕаламмыт.
Саргылаана БАГЫНАНОВА.
