Тыа хаһаайыстыбатын уонна ас-үөл бэлиитикэтин министиэристибэтигэр Үлэ сылын түмүктүүр итиэннэ Арассыыйаҕа Дьиэ кэргэн сыла, Саха Өрөспүүбүлүкэтигэр Оҕо сыла саҕаламмытын биллэрэр мунньах ыытылынна.
Сүрүн дакылааты оҥорбут тыа хаһаайыстыатын уонна ас-үөл бэлиитикэтин миниистирэ Артем Александров дойду уонна өрөспүүбүлүкэ салалталара АПК-ҕа ахсаабат кыһамньыларын ууралларын бэлиэтээтэ, хайысхаларынан барыллаан түмүктэри иһитиннэрдэ.
– Кэлэр сылга үлэ-хамнас көрдөрүүтүнэн күрэхтэһиигэ биһиги баалабай бородууксуйаны оҥорон таһаарыы кээмэйэ судаарыстыба өйөбүлэ төһө көдьүүстээхтик туһанылларын көрдөрөрүн быһыытынан, улуустарга рейтинг таһаарыахпыт. Бу ааһан эрэр сыл уон ыйын түмүгүнэн, баалабайынан 30 млрд солк. суумалаах тыа хаһаайыстыбатын бородууксуйата оҥоһулунна, бу ааспыт сылы кытары тэҥнээтэххэ, биир бырыһыанынан улахан. Кэлиҥҥи түөрт сылга үбүлээһин кээмэйэ 1,5 төгүл үрдэтиллибитин ааҕыстахха, бу ситэтэ суох тэтим. Өрөспүүбүлүкэҕэ ас-үөл өттүнэн куттал суох буоларыгар эппиэтинэһи сүгэрбит быһыытынан, биһиги бүддьүөттэн көрүллүбүт хас биирдии солкуобай көдьүүстээхтик туһанылларын, тыа сирин, тыа хаһаайыстыбатын сайыннарарга «үлэлиирин» ситиһиэх кэриҥнээхпит. Дойдубут уонна өрөспүүбүлүкэбит салалталара итинник соруктары туруораллар. Ил Дархан Айсен Николаев үүнэр сылы Оҕо сылынан биллэрбитин быһыытынан, агро-оскуолалары кытары үлэни күүһүрдүөхпүт, ону таһынан өрөспүүбүлүкэҕэ агротехнологическай үөрэхтээһин быстыбат тиһигин 2030 сылга диэри кэпсиэпсийэтин бигэргэтиэхпит, – диэтэ миниистир.
Ил Дархан Айсен Николаев Үлэ сылын чэрчитинэн, сыл аайы бэриллэр анал бириэмийэни олохтообута. АПК салаатыттан «Үлэ киһитэ» бириэмийэ лауреаттарынан буолбуттара: бааһынай хаһаайыстыбалар баһылыктара Ариада Маркова (Таатта), Станислав Семенов (Сунтаар), Алексей Герасимов (Дьокуускай к.), дьиэ кэргэн пиэрмэтин баһылыга Саргылаана Рожина (Амма), ыанньыксыт Марина Васильева (Мэҥэ Хаҥалас), И.Г. Спиридонов аатынан муниципальнай-унитарнай тэрилтэ салайааччыта Роман Туприн (Анаабыр). Үлэ сылын түмүктүүр тэрээһиҥҥэ үлэ дьонун чиэстээһин кинилэртэн саҕаланна.
«Саха Өрөспүүбүлүкэтин тыатын хаһаайыстыбатын үтүөлээх үлэһитэ» үрдүк аатынан: «Тумул» кэпэрэтип ньирэй көрөөччүтэ Зоя Верховцева (Мэҥэ Хаҥалас), «Хахсык» кэпэрэтиип салайааччыта Тамара Осипова (Хаҥалас), «I Күүлэт» кэпэрэтиип салайааччыта Елена Тутукарова (Бүлүү), «Гражданскай килбиэн» бэлиэнэн «Баҕарах» ХЭТ ыанньыксыта Екатерина Олесова (Дьокуускай к., Хатас) уо.д.а. наҕараадаланнылар.
Арассыыйаҕа Учуутал уонна уһуйааччы сылын түмүгүнэн, эдэр ыччаты үлэ мындырыгар уһуйар настаабынньыктар: астыыр-таҥастыыр салааҕа -- «Дьокуускайдааҕы үүт собуота» ААУо ыстаарсай маастара Валентина Федорова (Дьокуускай к.), табаны иитии салаатыгар -- «Өлөөн» муниципальнай-унитарнай тэрилтэ 5 №-дээх ыстаадатын биригэдьиирэ Василий Торопов (Өлөөн), сиртэн үүнээйини ылыы салаатыгар -- хортуоппуйга идэтийэр бааһынай хаһаайыстыба баһылыга Михаил Сивцев (Нам) министиэристибэ кубоктарын туттулар. «Бочуоттаах настаабынньык» анал бэлиэ хаһаайыннарынан «Тыымпы» кэпэрэтиип салайааччыта Николай Борисов (Бүлүү), «Котрус» бааһынай хаһаайыстыба баһылыга Екатерина Котрус (Дьокуускай к., Маҥан) буоллулар.
Саҥа сыл Арассыыйаҕа Дьиэ кэргэн сыла биллэриллибитинэн, мунньах кыттыылаахтара удьуор табаһыт ыалы чиэстээтилэр. Ыал ийэтэ, Мария Николаева «Өлөөн» муниципальнай-унитарнай тэрилтэ сүрүн зоотехнига, өрөспүүбүлүкэ тыатын хаһаайыстыбатын үтүөлээх үлэһитэ, таба салаатыгар В.М.Кладкин аатынан Судаарыстыбаннай бириэмийэ лауреата, Өлөөн оройуонунан сугулаанын дьокутаата, бу ыйга 60 сааһын бэлиэтээбитэ. Ыал аҕа баһылыга Василий Топоров өрөспүүбүлүкэ тыатын хаһаайыстыбатын туйгуна, ыстаада биригэдьиирэ, ыччат настаабынньыга. Өбүгэ төрүт үгэстэригэр бэриниилээх маннык ыаллар баар буоланнар, табаны иитиигэ өрөспүүбүлүкэ дойдуга инники күөҥҥэ сылдьар.
Раиса Сибирякова.
