Өрөспүүбүлүкэтээҕи көрбөттөр анал бибилэтиэкэлэригэр Улуу Кыайыы 75 сыллаах үбүлүөйүгэр аналлаах «Кыайыы дорҕоонноро» акция саҕаланна.
Бибилэтиэкэ саҥаны уонна дорҕоону устар устуудьуйатыгар саха буойун-суруйааччыларын айымньыларын «саҥарар» кинигэҕэ устан таһаарыахтара. Саха Өрөспүүбүлүкэтин култууратын уонна духуобунаска миниистирэ Юрий Куприянов Тимофей Сметанин «Саллаат сүрэҕэ» диэн фроннааҕы хоһооннорун хомуурунньугунан акцияны саҕалаата.
Бырайыак сыала-соруга – ыччакка сэрии кэминээҕи айымньылар ис хоһооннорун тиэрдии, ол көмөтүнэн төрөөбүт дойдуга, аҕам саастаах дьоҥҥо, төрөппүттэргэ ытыктабыллаах сыһыаны, тапталы иитии, ону тэҥэ эйэлээх, дьоллоох олох иһин охсуспут хорсун дьоммут ааттарын үйэтитии буолар.
«Эһиил Улуу Кыайыы 75 сыллаах үбүлүөйэ буолар. Хорсун хоодуот быһыылаах Ийэ дойдуну көмүскээбит ытык саллааттарга биһиги, эйэлээх олох дьоно, муҥура суох махтаныах тустаахпыт! Сэрии тиэмэтигэр уонна кыргыһыы уоттаах толоонугар суруллубут саха суруйааччыларын айымнньыларын үйэтитэн, тыыннаан, «саҥарар» кинигэ оҥорон акция тэриллэрэ оруннаах буоларын туһунан Юрий Степанович этии киллэрбитэ. Юрий Степанович ааҕыы түһүмэҕин салҕыы СӨ Айылҕа харыстабылын миниистиригэр Сахамин Миланович Афанасьевка уонна СӨ Ыччат дьыалаларыгар уонна социальнай коммуникацияларга миниистиригэр Степан Анатольевич Саргыдаевка туттарда», - диэн бибилэтиэкэ дириэктэрэ Айталина Никитина тоһоҕолоон эттэ.
Бу акция 2020 сыл муус устар ыйыгар диэри ыытыллыаҕа. Ыам ыйыгар «Кыайыы дорҕоонноро» диэн уопсай ааттаах «саҥарар» кинигэ хомуурунньуга тахсыаҕа.
Евгения Потапова
