Төрөөбүт тылынан үөрэтиини Арассыыйаҕа эрэ сарбыйа сатыыр буолбатах эбиттэр. Тохсунньу 23 күнүгэр Латвияҕа дойду оскуолаларын барытын латыш тылыгар көһөрөр туһунан сокуон ылыммыттара. Олунньу 8 күнүгэр Латвия Сеймата 2020-2021 үөрэх сылыттан латыш тылынан эрэ үөрэнэллэрин көҥүллээбитэ, онтон салгыы сис кэмитиэт бигэргэтэрэ эрэ хаалбыт. Сейма 87 дьокутаатыттан 66-та бу сокуон олоххо киирэрин өйөөн куоластаабыт.
Ол эрээри, өскөтүн Арассыыйаҕа национальнай өрөспүүбүлүкэлэргэ төрөөбүт тылынан үөрэтии алын кылаастарга эрэ көҥүллэнэр буоллаҕына, Латвияҕа олохтоох аҕыйах ахсааннаах омуктар (нууччалар, белорустар, укараиналар нэһилиэнньэ 30 %-нын ылаллар, ол эбэтэр, 700-чэкэ тыһ. киһи) 9-с кылааска диэри төрөөбүт тылларынан үөрэнэллэрэ көҥүллэнэр. Оскуола толору латыш тылыгар 10-12-с кылаастарга эрэ көһөр.
Онтон сылтаан, Арассыыйаҕа кэккэ дьон “нуучча тылын атаҕастаан, дьиэ иһигэр эрэ туттуллар “бытовой тылга” кубулутан эрэллэр” диэн айдаарар сурахтара иһиллэр. Айдаарыах иннинэ бастаан бэйэни көрүнүөх баар этэ.
Таарыйа, Латвия нэһилиэнньэтэ, баара-суоҕа, 1,9 мөл. эрэ киһи. Тылларын туһугар долгуйаллара бааламмат.
