Берлинале киинэ бэстибээлигэр – саха артыыстара

Былырыын олунньу-муус устар ыйдарга Болгария биллэр режиссера, Венецианскай киинэ бэстибээлин кыайыылааҕа Милко Лазаров Саха сиригэр кэлэн “Ага” диэн киинэни устубута. Бу киинэ сүрүн оруолларын Саха тыйаатырын артыыһа Михаил Апросимов уонна Феодосия Иванова оонньообуттар. Оттон эпизодтарга Сергей Егоров (“Феррум” киинэ) уонна Галина Тихонова (“Сайсары күөлгэ түбэлтэ”) уһуллубуттар. Киинэни Дьокуускай, Мииринэй куораттар чугастарыгар уонна Хаҥаласка устубуттар. Көрөөччүлэр Өлүөнэ туруук хайаларын, алмаас хостонор сирдэрин көрүөхтэрэ. Бастаан киинэни Канадаҕа эбэтэр Гренландияҕа устарга былааннаабыттар. Оттон биһиги дойдубутугар кэлэн, айылҕатын сөҕөн-махтайан баран манна устарга быһаарыммыттар.

Киинэни Болгария, Франция уонна Германия кыттыһан таһаарбыттар. Ньиэмэстэр устар камераны биэрбиттэр, францустар – пленканы. Оттон Саха сириттэн «Al look studio» киинэни оҥорууга кыттыспыт. Саха сириттэн киинэни оҥорууга 30 киһилээх хамаанда үлэлэспит. Продюсердар Сардаана Саввина уонна Любовь Борисова Саха сирин устар хамаандатын салайбыттар. “Ага” киинэ (киинэ сүрүн дьоруойун аата) сахалыы тылынан барар. Биһиэхэ бу киинэ прокакка тахсара-тахсыбата билиҥҥитэ биллибэт. Европа продюсердара тугу быһааралларыттан тутулуктаах. Киинэ аан бастаан олунньу 23 күнүгэр Берлин куоракка Berlienale-2018 норуоттар икки ардыларынааҕы киинэ бэстибээлин чэрчитинэн көстүөҕэ. Бу бэстибээлгэ “Ага” сүрүн бырагыраамаҕа киирбит. Сахалар оонньуур киинэлэрэ бэстибээлгэ аан дойду биллэр режиссердарын: Лав Диаз, Стивен Содерберг, Жозе Падилья, Уэс Андерсен уо.д.а. хартыыналарын кытары тэҥҥэ күрэстэһиэҕэ. Үс артыыс: Дмитрий Апросимов, Феодосия Иванова уонна Галина Тихонова ыҥырыллыбыттар. Кинилэр бу күннэргэ Берлиҥҥэ бараары оҥостоллор. Биир дойдулаахтарбытыгар ситиһиилэри баҕарабыт!