Саха сиригэр ойуур уотун балаһыанньата билигин да уустук. Баһаардары умуруорууга турар-турбат бары күүһүн холбуур. Мэҥэ-Хаҥаласка уоту кытта охсуһар дьоҥҥо анаан Майаҕа нэһилиэнньэттэн көмө киирэ турар. Нэһилиэнньэттэн көмөнү хомуйуу хайдах быһыылаахтык бара турарын биһиги кэрэспэндьиэммит Евгений Васильев тус бэйэтэ тиийэн билсэ-көрсө сылдьар.
Мэҥэ Хаҥаласка саамай быһаарыылаах, ыарахан кэмҥэ нэһилиэк дьоно-сэргэтэ биир санаанан, бэйэлэрин баҕа өттүлэринэн кэлэннэр аһынан-үөлүнэн, бородуукталарынан, таҥаһынан-сабынан, туттар сэбинэн-сэбиргэлинэн, эминэн-томунан күн аайы көмөлөһө тураллар. Маныаха туох баар көмө учуоттанан иһэр эбит. Ону кинилэр бэйэлэрэ ыстаакка ыланнар, барыларын учуоттаан, суруйан, наардаан бараннар тустаах массыынанан уоту кытары охсуһа сылдьааччыларга ыыталлар. Балыыһалар, аптекалар туора турбакка, быһачыы көмөлөһө олороллор. Маҕаһыыннар, урбаанньыттар, биирдиилээн дьон, түөлбэнэн күүс-көмө буолаллар. Бу курдук сомоҕолостохторуна эрэ күүстээх баһаары умуорууга төһүү күүс буолалларын өйдүүллэр уонна барыта этэҥҥэ буолуо диэн эрэллээхтэр. Бүгүҥҥү туругунан дьон үүт аһы, оҕурсу, помидор, кэнсиэрбэ, лапса, гречка, бичиэнньэ, саахар, килиэп уо.д.а. бородуукталары ыыппыттар.
Мэҥэ-Хаҥалас улууһун социальнай бэлиитикэҕэ салалтатын салайааччыта Ирина Егоровна Назарова маннык кэпсиир:
- Биһиги салалтабыт Майаҕа урукку «Кыталык» дьиэтигэр үлэлиибит. Бэйэбит испитигэр өрөспүүбүлүкэҕэ арас баһаардар буола туралларын көрө-истэ, билэ сылдьаммыт сүрдээҕин дьаархана, сэрэнэ кэтии сылдьыбыппыт. Быйыл сайын биһиги улууспутугар улахан баһаар турбакка сылдьыбыта, оттон бу Сыымахха, Табаҕаҕа уот эмискэ туран бэйэбит бу салалтабыт иһинэн ыччат баҕа өттүнэн үлэлиир. Атын улуустар уопуттарыгар олоҕуран ыстаап тэриннибит. Маны билээт даҕаны, биир дойдулаахтарбыт үтүө санааларынан көмөлөһөн, туох баар наадалаах туттар сэби-сэбиргэли, аһы-үөлү аҕалан барбыттара. Ким харчынан, тугу кыайарынан, бэл сүбэнэн-аманан көмөлөһөллөр;ттэн санаабыт бөҕөргүүр. Бассаапка бөлөх тэриммиппитигэр сүрдээх элбэх киһи киирэн көмө кэлэрэ өссө элбээтэ. Олус түмсүүлээх, биир сомоҕо буоларбыт сүҥкэн суолталааҕын биллибит. Билигин бары биир сыалы-соругу туруораммыт, бу улахан соругу кыайарга үлэлэһэ сылдьабыт. Манна биһиги тута массыыналарбытын, туох баар кыахпытын барытын улууспут салалтатын кытта бииргэ сүбэлэһэн оҥоро сатыыбыт. Табаҕа баһаарыгар күүскэ үлэлэспиппит түмүгэр, уот кыччаан, билигин бары күүһү Сыымахха уурдубут. Маныаха биһиги көҥүл ыстааппытыттан көҥүл көмөлөһөөччүлэр кэлэннэр инструктажка илии баттаан, дьаҥ буолан, термометрияны ааһаат, Сыымаҕынан, Табаҕанан, күүстээх баһаар буола турар сирдэринэн бараллар. Эр дьоммут бары күүстэрин ууран туран үлэлииллэр. Билиҥҥи туругунан түмсүүлээхпитин көрдөрөн, бары күүспүтүн түмэн, ааҥнаабыт алдьархайы хайаан да кыайыахпытын наада. Эбии көмө Дьокуускайтан, атын улуустарга олорор биир дойдулаахтарбытыттан кэлэрэ олус үөрдэр. Түгэнинэн туһанан биир дойдулаахтарбар бу курдук ыарахантан чаҕыйбакка, бары күүскүтүн-кыаххытын ууран туран күүс-көмө буоларгыт иһин махталбын биллэриэхпин баҕарабын.
«Аргыскредиткооператив» Майатааҕы учаастагын үлэһиттэрэ санааларын үллэстэллэр:
- Улууспутугар буола турар ыксаллаах быһыыга-майгыга бэйэбит сэмэй кылааппытын киллэрэбит. Көмө хаһан даҕаны кыра буолбат, кыра да буоллар бары түмсэн маннык көмөлөһө сылдьарбыт олус наадалаах. Бу курдук көмөҕө кыттыһан иһэргитигэр ыҥырабыт!
