Саха Өрөспүүбүлүкэтин салалтатын уонна тус бэйэм ааппыттан Саха сирин норуоттарын VIII спортивнай оонньуулара саҕаламмытынан эҕэрдэлиибин!
Успуорт улахан бырааһынньыга өрөспүүбүлүкэ 100 сыллаах үбүлүөйдээх сылын биир чаҕылхай түгэнинэн буолуоҕа.
Бу оонньуулар успуорду сайыннарыыга бастыҥнар ахсааннарыгар киирэр Уус Алдан улууһугар ыытыллаллар. Чуолаан мантан, аан дойду саамай улахан алааһыттан – Тойон Мүрүттэн саҥа Саха сирин бөдөҥ күрэхтэһиилэрэ саҕаланаллар. Манна, Майаҕатта Бэрт Хара дойдутугар, 1996 сыллаахха Өрөспүүбүлүкэ норуоттарын I спортивнай оонньуулара ыытыллыбыта.
Улууска маннык улахан тэрээһин ыытыллара салгыы сайдарга саҕахтары арыйар. Ол курдук, Бороҕоҥҥо 1000 миэстэлээх стадион, Чараҥҥа 1124 миэстэлээх, трибуналаах ипподром, маны тэҥэ Мындаабаҕа 32 миэстэлээх уопсай дьиэлээх спортивнай күөн көрсүһүү араас хайысхалаах комплекса, үөрэх тэрилтэлэригэр икки спортивнай площадка тутулунна. Маны таһынан быйыл оройуон киинигэр элбэх хайысхалаах успуорт-чэбдигирдэр комплекса тутуллан үлэҕэ киириэҕэ. Бу эбийиэктэр сэлиэнньэлэргэ эрэ буолбакка, улуус үрдүнэн спортивнай олох саҥа кииннэринэн буолуохтара.
Успуорт бырааһынньыгын иннинэ Бороҕоҥҥо В.В. Никифоров –Күлүмнүүр аатынан Култуура дыбарыаһа арылынна. Кэнники сылларга улууска барыта 30 социальнай эбийиэк тутулунна.
Күрэхтэһиилэргэ өрөспүүбүлүкэ бары оройуоннарыттан уонна куораттарыттан, үрдүк үөрэх тэрилтэлэрин хамаандаларыттан 2000 кэриҥэ спортсмен кыттыаҕа. Кинилэр 16 көрүҥҥэ – баскетболга, волейболга, мини-футболга, чэпчэки атлетикаҕа, остуол тенниһигэр, спортивнай тустууга, дуобакка, саахымакка, оҕунан ытыыга, спортиҥҥа, буоксаҕа, гиирэ успуордугар, буулдьанан ытыыга, аэробикаҕа, доруобуйаларынан хааччахтаахтар чэпчэки атлетикаларыгар уонна ГТО многоборьетыгар күөн көрсүөхтэрэ.
Оонньуулар өрөспүүбүлүкэ элбэх омуктаах норуота сомоҕолоһуутугар, Сахабыт сирин олохтоохторо өй-санаа уонна эт-хаан өттүнэн туруктарын бөҕөргөтүүгэ, чөл олоҕу тарҕатыыга төһүү күүс буоллаллара саарбахтаммат.
Саха сирин норуоттарын VIII спортивнай оонньуулара үрдүк таһымнаахтык ааһыаҕа, ыалдьытымсах Уус Алдан сирэ ил-эйэ, үтүө санаа уонна саҥаҕа дьулуһуу биһигэ буолуоҕа диэн эрэнэбин. Хас биирдии кыттааччыга чиэһинэй күөн көрсүһүүлэри уонна чаҕылхай кыайыылары, онтон көрөөччүлэргэ бу сэдэх, умсугутуулаах түгэни дуоһуйа көрөллөрүгэр баҕарабын! Успуорт бырааһынньыгынан!
Саха Өрөспүүбүлүкэтин Ил Дархана А.С. Николаев
