Глафира Васильева
-
-
Саха Ийэ ынаҕа
Хараҕынан-кыраҕынан,
Харах хатаммат,
Өлбөөркөй өҥҥүнэн
Өйгө хаалбаккын.
Чуораҕайкаан бэйэкэҥ,
Чаҕыйбаккын тымныыттан.
Тутум үрдүк атаҕыҥ
Тоҥуу хаартан иҥнибэт..
Үс саха өнүйэригэр
Үйэлэргэ өллөйдөнөргө
Үөскэппит, эйигин айылҕа.
Ис дьиҥэр киирдэххэ,
Ийэ тэҥэ ииппиккин.
Аҕалыы бэрийэн,
Аһаппыккын, таҥыннарбыккын.
Сүрэх сөлүөрэр,
Сүһүөх сүүдүйэр,
Сүөгэйиҥ, арыыҥ,
Сүрдээҕин иҥиирдиир.
Туоххун туһамматыбыт?
Туохха туттубатыбыт?
Суораккыттан сэниэлэнэн,
Сиҥэҕинэн утахтатан,
Бөлөнөххөр бөҕөргөөн,
Бырпаҕынан быыһанан,
Таргар торолуйан,
Ойдубуппутун оһорунан,
Силлибиппитин самсанан,
Саха киэбин туттахпыт!
Тура кэтиллэр таҥас,
Тигиллэрэ тириигиттэн,
Этэрбэс эгэлгэтэ,
Эмчиирэ сиэдэрэйэ,
Эмиэ эйигиттэн буолара..
Иэниҥ иҥииринэн
Иилэ быраҕан,
Эпсэри тардарга,
Илиилээх эрэ ылсара.
Туура тэбэр туйаҕын,
Тиһилик тимэх буолара.
Үллүмэй үрүҥү астыырга,
Үтүөкэннээх муос ытык
Ситэритин бултуурга
Сиһин ороҕун тириитэ,
Айа кирсигэр тардыллан,
Аарыма тайаҕы охтороро.
Эйигиннээх буоламмыт,
Эстибэтэх эбиппит,
Тулуурдаах ньирэйдээх,
Бөҕө таҕа борооскулаах,
Торолуйар тыһаҕастаах,
Үөтэлимтиэ өҥүрэмэрдээх,
Үтүө-мааны үрүҥнээх,
Бөҕө бигэ ыйаахтаах,
Саха ынаҕын сарсыҥҥыта
Самныбатын туһугар
Айылҕабыт бэлэҕин
Арчылыаҕыҥ, харыстыаҕыҥ!
Үөһээ Бүлүү, с.Онхой, 24.03.2021 г.
Сэҥээриилэр