Сунтаар улууһун Маар Күөл нэһилиэгиттэн 5 килэмиэтирдээх сиргэ ойуур умайар. Бу туһунан улуус Биир кэлим диспиэччэр сулууспата иһитинэрэр. Нэһилиэги тула минерализованнай балаһа төгүрүтүллүбүт, цистенэлээх уу бэлэмнэниллибит. Сэлиэнньэҕэ бэҕэһээ ыксаллаах быһыы-майгы балаһыанньата биллэриллибит.
“Уопсайа 155 гектаардаах сиргэ уот умайар. Минерализованнай балаһа тардылынна, уулаах иһиттэр бэлэмнэниллибиттэр. 20 киһи дьуһуурустубалыыр, икки АЦП массыыната баар. Баһаар хонтуруолга ылылынна”, - диэн ЕДДСка билиһиннэрэллэр.
Билигин нэһилиэккэ 28 кыраадыс куйаас турар, тыал баһаар кытыытыттан үрэр. Маар Күөлгэ 500 киһи олорор, ол иһигэр 120 оҕо. Дьону көһөрөр наада билиҥҥитэ турбат.
