Сэлии муоһунан эргинии бэрээдэктэниэ

Олохтоох бырабыыталыстыбаҕа сэлии кэминээҕи палеонтология матырыйаалларын таҥастааһын уонна батарыы боппуруоһун кэпсэттилэр. Бырамыысыланнас уонна геология миниистирэ Максим Терещенко бу хайысханы бэрээдэктииргэ туһаайан 2017 сыллаахха сэлии фаунатын матырыйаалларын хомуйуу, үөрэтии, туһаныы уонна таҥастаан батарыы Кэнсиэпсийэтин бырайыага бэлэмнэммитин, ол докумуон ырытыы уонна сөпсөһүннэрии таһымыгар тиийбитин билиһиннэрдэ.

Онно олоҕуран, атыы-тутуу былаһааккатын тэрийэн, аһаҕас электроннай атыыны киллэрэн, сэлии муоһун батарыыны сокуон иһинэн ыытар, муос атыылаһыллар сыанатын үрдэтэн, өрөспүүбүлүкэ бүддьүөтүгэр киирэр нолуогу улаатыннарар сорук турар. Миниистир эппитинэн, атыы былаһааккатын «Мамонтовый экспортный центр Республики Саха (Якутия)» ХЭУо базатыгар оҥорор этии киирбит. Сыала – сэлии муоһунан эргинэн бөдөҥ эпэрээтэрдэри уонна өрөспүүбүүлүкэ, Арассыыйа тустаах институттарын түмэн, сэлии муоһунан эргинии, таска таһаарыы ырыынагын бэрээдэктиир былааннаахтар. Дойду институттарын кытта сэлии муоһун экспорка анаан, аукционнаах атыытын тэрийии, тас дойду ырыынактарыгар сэлиини сырьенан эрэ буолбакка, полуфабрикат оҥорон уонна бэлэм бородууксуйанан батарар гына, оннооҕу быыһыны-майгыны ырытан, атыыны-тутууну кэҥэтэргэ суоттаналлар.

Госдума дьокутаата Галина Данчикова сэлии муоһа хостонор сирдэригэр сыһыаннаан “О недрах” РФ сокуонугар уларытыылары киллэриигэ үлэ барарын иһитиннэрдэ. Холобур, кэллиэксийэлиир матырыйааллары кэмиэрчэскэй сыалга анаан хостуур сирдэри эрэгийиэн суолталаах учаастактарга киллэрэр туһунан өрөспүүбүлүкэ этиилэрэ учуоттаммыттара диэтэ.

Бырабыыталыстыба премьерин э.т. Владимир Солодов сэлии муоһун электроннай атыытын ыытар былаһаакканы кылгас кэм иһигэр тэрийэ охсон, сүрэхтэниитин бу балаҕан ыйыгар Владивостокка буолуохтаах Илиҥҥи экэниэмикэ форумугар сүрэхтииргэ сорудахтаата. Кэнсиэпсийэ “Дорожнай каартатын” оҥорууну тэтимирдэргэ эттэ. Оччотугар сэлиини таска таһаарыы легальнай ньыматын оҥоруу кыаллыа диэтэ. Сэлии муоһугар биир бастакынан муос кыһыытынан дьарыктанар кииннэрдээх Кытай хампаанньалара улахан интэриэстээхтэр. Оттон ол – үп-харчы киирэр суола.