Санатан эттэххэ, Мииринэй оройуонугар атырдьах ыйын 16 – 18 күннэригэр нуорманы аһарар сөҥүү түһэн, Иирэлээх үрэх уутун таһыма үрдээн, АЛРОСА хампаанньа быһыттара тоҕута барыталаан, Бүлүү, Оччугуй Ботуобуйа, Иирэлээх уулара киртийбиттэрэ. Ону таһынан, Бүлүү өрүс кытылыгар олорор Сунтаар улууһун олохтоохторо иһэр уута суох хаалбыттара.
Саха Өрөспүүбүлүкэтин Уопсастыбаннай палаататын чилиэнэ Надежда Львова билиҥҥи балаһыанньа туһунан биһиэхэ биллэрдэ:
— Билигин АЛРОСА хампаанньа бары күүһү быһыттары бөҕөргөтөргө уонна Сунтаар улууһун олохтоохторун кытта көрсүһэн, дьон бэйэлэрин эрэх-турах сананалларын курдук үлэ ыыта сылдьар. Олохтоохтор уу баһар массыына тиийбэтиттэн, икки-үс күн инниттэн иһэр ууну сакаастыыллар. Төһө даҕаны киртийбит уу састаабыгар химическай элимиэн суоҕун иһин, ууга сиэри таһынан кумах уонна буор элбэх буолан, киһи иһэригэр сөбө суох.
Айылҕа харыстабылын министиэристибэтин испэсэлиистэрэ Сунтаар, Бүлүү оройуоннарыгар уу хаачыстыбатын боруобатын күн ахсын ылаллар. Ол курдук Оччугуй Ботуобуйа уонна Бүлүү өрүһүн Сүлдьүкээр нэһилиэгэр диэри уута ыраас, оттон Сунтаар уонна Ньурба улуустарыгар өссө да болоорхой диэн исписэлиистэр бэлиэтииллэр.
Санатар буоллахха, экология министиэристибэтэ АЛРОСА хампаанньа Оччугуй Ботуобуйа, Иирэлээх үрэхтэрин уонна Бүлүү Эбэни киртиппитин иһин туһааннаах дьоҥҥо административнай эппиэтинэһи сүктэрдэ. Билигин төһө хоромньу тахсыбытын ааҕаллар.
