Ойуур уотуттан уонна ардахтартан сылтаан Кэбээйи улууһугар икки улахан ходуһа улаханнык эмсэҕэлээтэ.
Сииттэ нэһилиэгэр Уот Сиэбит уонна Үрэх Таҕыс диэн ходуһаларга урулуоннаах от ууга барда. Горнай улууһугар тохтообокко түспүт ардахтан сылтаан, үрэх туолан, Кэбээйи улууһугар хаатыттан таҕыста. Нэһилиэк дьаһалтатыгар эппиттэринэн, 150 туонна от ууга устубут.
Тамылҕан нэһилиэгэр 5 гектардаах ходуһаҕа уот турбут. Олохтоохтор бэйэлэрин күүстэринэн уоту умуллара сатаабыттар да, уот иккистээн күөдьүйбүт. Билигин миэстэтигэр баһаарынай сулууспа, ойуур хаһаайыстыбатын үлэһиттэрэ уонна олохтоохтор уоту бохсоллор. Олохтоохтор этэллэринэн, уоту суһаллык умулларбатахтарына, үрэх нөҥүө таҕыста да, уот кэбиһиилээх оттору былдьыан сөп.
Билиҥҥи туругунан Кэбээйи улууһугар 16,5 туонна от бэлэмнэммит, ити былааннаммыттан - 96%.
