Атырдьах ыйын бүтүүтэ Иирэлээххэ саахал тахсыытын түмүгэр сүһүрбүт Бүлүү Эбэ экологическэй туругун чинчийиигэ анаан 265 мөл. солк. көрүөхтэрэ.
Бу иннинэ Росприроднадзор Саха сиринээҕи управлениета Бүлүү өрүскэ тахсыбыт хоромньу быһа барыллаан 22 млрд солк. тэҥ диэн биллэрбитэ. Ил Дархан Айсен Николаев Ил Түмэҥҥэ Бүлүү бөлөх улуустарыгар экология туругун үөрэтэргэ чинчийии бырагырааматын оҥорорго сорудахтаабыта. Ол курдук, бырагыраама чэрчитинэн, Бүлүү умнаһын олохтоохторун доруобуйаларын сыллата кэтээн көрөр дьаһал ылыллыахтаах. Маны таһынан, бырагыраама олохтоохторго мэдэссиинэ көмөтүн оҥорорго анаан биомэдэссиинэ технологиятын туһанар кыаҕы биэрэҕэ. Бу бырагыраама 2019-2023 сс. болдьохтоох үлэлиэҕэ.
Экология миниистирэ Сахамин Афанасьев “ахсынньы 5 күнүгэр бырагыраама бырайыага бырабыыталыстыба көрүүтүгэр киириэҕэ”, - диэн Ил Түмэн мунньаҕар иһитиннэрбитэ.
Кини Саха сирин билимҥэ Академията номнуо алмаас бырамыысалыннаһа тулалыыр эйгэҕэ дьайыытын быһаарарга (чуолаан АЛРОСА кыттыгаһын быһаарыыга) араас чинчийиилэр баралларын эттэ, маны таһынан, Бүлүү уонна Марха умнастарыгар олорор нэһилиэнньэ доруобуйатын туругун чинчийбиттэр.
Сахамин Миланович этэринэн, учуонайдар Бүлүү өрүскэ тахсыбыт хоромньуну быһаарыахтара, итиэннэ өрүстэр төһө киртийбиттэрин сыаналыахтара уонна 2019-2023 сс мониторинг салгыы хайдах ыытыллыахтааҕын тобулуохтара.
Нэһилиэнньэ доруобуйатын туругун чинчийии СӨ Доруобуйа харыстабылын министиэристибэтин лииньийэтинэн барыаҕа.
