Иһэр уу: кириэстээхтэр Угуйаҕа, Бүөр уонна Бэс күөллэригэр эрэнэллэр

Өрөспүүбүлүкэ былаастара  2024 сылга диэри  Саха сирин нэһилиэнньэтин 70 % аныгы ууну ыраастыыр утумнунан хааччыйыахтаахтар. Онно анаан-минээн 9 млрд солк аныахтаахтар.

Оттон күн бүгүн балаһыанньа хайдаҕын кэпсиибин. Сүлдьүкээргэ, Кириэстээххэ иһэр уу тула дьыала хайдаҕын куруук биллэрэ турабын.  900 киһи олорор Кириэстээх сэлиэнньэтин олохтоох дьаһалтата, ыраас уунан хааччыйыыны бэйэтин хонтуруолугар тутан олорорун туһунан миэхэ  баһылыгы солбуйааччы Владимир Гаврильев эттэ.

Урут бу дьыала чааһынай урбаанньыт илиитигэр баара.  Бүлүү уута муҥутуурдук болооруйар кэмигэр, Кириэстээх ууну ыраастыыр дьоҕус ыстаансыйата лиитирэтин 5 солк атыылыы олорбута. Билигин  дьаһалта баһылыгын солбуйааччыта эппитинэн, биир лиитирэ иһин  1 солк  төлөнөр. Онон сыана арыый ама буолбут.

Тус бэйэм санаабар, Кириэстээх аннынан Бүлүү өрүс мууһа саһархайдыҥы өҥнөөҕүттэн сыныйдахха, мантан көһөҥө ылан ириэрэн, сөҥүрдэн ууланар төрүт сатаммата көстөр.  Аҕыйах хонуктааҕыта  Сунтаарга бара сылдьан, сэлиэнньэ аннынан муус соччото суох өҥнөөҕүн көрөн сүрүм сөрүөстэн кэллим.  

Маннык ууну иһэр кутталлаах.  Дьаһалта баһылыгын солбуйааччы В.Гаврильевтан  ыраас уу саппаастаах сирдэр тустарынан токкоолостум.  Тоҕо диэтэххэ, Кириэстээххэ  ыкса чугаһынан дириҥ, ып-ыраас уулаах бөдөҥ күөл суох дойдута.

Владимир Владимирович эппитинэн, ыраах сытар  Бэс күөлэ уонна Бүөр күөлэ сыныйан тургутуллаллар.

Бу Эбэлэргэ баар уу Санэпиднадзор уонна Ростпотребнадзор ирдэбиллэригэр толорутук эппиэттииллэрэ наада.

Санатан эттэххэ, ааспыт күһүн Кириэстээх олохтоохторо, Угуйаттан уонна чугастааҕы ууну ылан ыстаансыйаҕа тиэйэн ыраастатан, сөҥүрдэн иһэ олорбуттара.

Оттон былдьаһыктаах уулаах сир сэлиэнньэттэн чугас от үрэх дьүүктэтэ сотору уостан хаалбыта.  Хаар түһүөн аҕай иннинэ, Угуйа үрэх букатын уолан, сүүрүгэ сүтэн, дьон улаханнык ыксыы сылдьыбыттара.  Хата, олохтоох дьаһалта түрбүөн түһэрэн, Сунтаартан  ыраастаммыт уулаах бодобуоскалар кэлэн абыраабыттара.  Итини аахтахха уонна хайдах дьыл, саас, сайын, күһүн буолуохтарын  кырдьаҕастар сылыктыылларынан, иһэр уу кыһалҕата  аны да уолдьаспат чинчилээх.  Оттон  11 тыһ нэһилиэнньэлээх Сунтаар сэлиэнньэтигэр, олунньу ый саҥатыгар, ууну ыраастыыр ыстаансыйа үлэҕэ киирдэ.  Аны маннык ыстаансыйалар  нэһилиэктэргэ баар буолаллара ирдэнэр. Оннук сүдү барыл туоларыгар Саха сирин бырабыытылыстыбата күүскэ үлэлиирэ эрэйиллэр.  Эбиитин  иһэр ууну ылар дириҥ скважиналары өрөспүүбүлүкэ, Сунтаар улууһун хас биирдии нэһилиэгэр хастарарын кэм-кэрдии ирдиир.

Станислав Алексеев, Мииринэй куорат