Муус устар 22 күнэ – Аан дойдуга сир күнэ. Бу бэлиэ күн чэрчитинэн Сиргэ, сир баайыгар сыһыаҥҥа уонна экологияҕа кэмитиэтэ, Өрөспүүбүлүкэтээҕи “Бэлэм буол+” оҕо хаһыата “Сырдык баҕа санаа кыната” биидьийэ күрэһин биллэрэр.
Соторутааҕыта Инстаграм ситимигэр кырачаан Эрэлчээнэ Индигиир өрүскэ баҕа санаатын эппит биидьийэтэ тарҕанан, дьон сүрэҕин сүүйдэ. Надя Слепцова-Эрэлчээнэ “Бэлэм буол+” хаһыат эрэдээксийэтигэр ыалдьыттаата:
-Үтүө күнүнэн! Мин Дьокуускай куорат 31 №-дээх орто оскуолатыгар VI “А” кылааска үчүгэйдик үөрэнэбин. Хомус, үҥкүү куруһуоктарыгар уонна “TAYA” муода ааҕыныстыбатыгар (*агенство) дьарыктанабын. Сөбүлүүр дьарыгым – ырыа. Кыра сааспыттан ыллыыбын. Аҕам Максим Алексеевич дьарыктыыр.
- Аҕам - саамай чугас киһим. Кыра эрдэхпиттэн аҕабыныын бииргэ сылдьабыт. Кини миигин олох үөрүйэхтэригэр үөрэтэр. Куска, балыкка илдьэ сылдьар. Айылҕаны олус таптыыбын. Дьон оту-маһы алдьаталларын сөбүлээбэппин. Төрөөбүт дойдум ¾ Абый улууһун Кэбэргэнэ нэһилиэгэ. Уута ырааһа, салгына чэбдигэ. Кэрэ, ураты дойду!
- “Бэлэм буол+” хаһыат ааҕааччыларын айылҕаны харыстыырга ыҥырабын. Кэрэни оҥорорго өрүү БЭЛЭМ БУОЛУҤ!
Владимир Михайлович Прокопьев, Ил Түмэн сиргэ, сир баайыгар сыһыаҥҥа уонна экологияҕа Сис кэмитиэтин бэрэссэдээтэлэ:
- - Муус устар 22 күнүгэр Аан дойдуга Сир күнүнэн сибээстээн, Ил Түмэн дьокутаата, “Ситим” медиа-бөлөх генеральнай дириэктэрэ Мария Христофорова көҕүлээһининэн “Бэлэм буол+” оҕо хаһыатын кытта олус үчүгэй күрэс биллэрдилэр. Бу күрэс төрүөтүнэн Надя Слепцова Индигиир өрүскэ баҕа санаатын эппит биидьийэтэ буолар. Сирбитин-уоппутун, айылҕабытын харыстыы үөрэннэхпитинэ, Сахабыт сирин айылҕата өрүү чөл буолуоҕа. Күрэскэ көхтөөхтүк кыттыҥ уонна ситиһиини баҕарабын!
Өрөспүүбүлүкэтээҕи “Сырдык баҕа санаа кыната” күрэс балаһыанньата
Сыала: Оҕоҕо төрөөбүт дойдуга тапталы иҥэрии, айылҕаҕа харыстабыллаах сыһыаны иитии.
Сүрүн ирдэбилэ:
- Күрэскэ ким баҕалаах 1 биидьийэнэн кыттар.
- Кыттааччы айылҕаҕа, төрөөбүт дойдутугар баҕа санаатын биидьийэҕэ устан электроннай почтаҕа эбэтэр Инстаграм ситимҥэ ыам ыйын 27 күнүгэр диэри ыытар.
- Кыттар оҕо туһунан сиһилии ыспыраапка (кылааһа, оскуолата, улууһа, төлөпүөнэ) ирдэнэр.
Кыайыылаахтар бэс ыйын 1 күнүгэр, Оҕо көмүскэлин бырааһынньыгар, добун суруктарынан, бириистэринэн наҕараадаланыахтара. Көхтөөхтүк кыттыбыт оҕолор туоһу сурук тутуохтара. Киирбит биидьийэлэр Инстаграм ситимигэр, Кыым.ру саайтка тахсыахтара.
Эрэдээксийэ аадырыһа: Дьокуускай к., Кирова уул., 18, Бизнес-киин (“В” блок), 7 этээс, 709 хос.
Билсэр төлөпүөннэргит: 42-21-08, 34-47-40
Электроннай почта: Этот адрес электронной почты защищён от спам-ботов. У вас должен быть включен JavaScript для просмотра.
Instagram: belembuol
Оҕолоор, күрэскэ көхтөөхтүк кыттыҥ!
