Бу күннэргэ Горнай нэһилиэктэригэр эһэлэр суол кытыытыгар көстөр буолбуттарын туһунан араас иһитиннэриилэр киирэллэр. Бүгүн Ынахсыт эргин икки кулунчугу улаханнык бааһырдан ыыппыттарын бэтэринээрдэр эмтииллэр.
Тыатааҕылар Бэрдьигэстээх чугаһыгар көс иһинэн сылдьан отчуттарга, сир астааччыларга көстөр буоллулар. Тыастан – уустан да дьаадьыйбаттар.
Бүгүн Ынахсыт эргин сылгылаах дьон үөрдэриттэн икки биэ сүтүктэннилэр. Хантан да була иликтэр. Икки кулунчугу улаханнык баастаан ыыппыттарын бэтэринээрдэр эмтии сылдьаллар. Үтүөрэллэрэ уустук, улахан көрүү – истии наада буолсу.
Онон маннык сайыннары дьиэ сүөһүтүгэр кутталы үөскэппит кыыллары бултаһар наадата тирээбит. Сир астааччылар, ойуурга тахсааччылар ураты сэрэхтээх буоларгытыгар сүбэлииллэр.
Бу кыыллар саас эмиэ баардарын биллэрбиттэрэ.
Василий Алексеев, ulus.media
