Ааспыт нэдиэлэҕэ икки сиргэ ойуур баһаара умуруоруллубут. Моркуока үрэх тахтахаан мастаах, алыылардаах тыатыгар син-биир көрдүгэннээн сии сытар. Ардахтаабатаҕа ырааппыт буолан, сир кубус-кураанах.
От ыйын 26 күнүгэр, Мииринэй оройуонун үрдүнэн 87 тыһ гектар иэннээх сиргэ алта баһаар баара бэлиэтэммит. Маны умуорууга оройуон бэйэтин күүһэ кыра буолан, Забайкалье уонна Бүрээтийэ “Авиалесохранатын” этэрээттэрэ суһаллык ыҥырыллыбыттара. Ордук улахан кутталы Таас-Үрэхтэн соҕуруу уонна арҕаа, икки көс тэйиччи тыаҕа тахсыбыт үс баһаар үөскэтэ сырыттылар. Ол төрүөтэ биллэр. Манна Орто-Ботуобуйатааҕы бырамыысалынастаах учаастакка, ньиэп-гаас турбата, геологическай уонна хостуур скважиналар, Чайыҥдаҕа диэри барар уматык сүүрдүллэр ситимэ бааллар. Онон, Таас-Үрэх баһаардарын бастатан туран умуора сатаатылар. Саха сирин арҕаа өттүгэр кытыастыбыт ойуур баһаардарын содула мөкү. Хаарыаннаахай тыа кытарарга былдьанна. Эбиитин ыаллыы сытар Иркутскай уобалас Киренскэй, Катангскай оройуоннарын баһаара эмиэ биһиэхэ сабыдыаллаатылар. Ол диэки тахсар ойуур баһаардарын иэнэ улахан. Онтон сылтаан буруо Өлүөнэ өрүһү, Осетровоттан саҕалаан Ленскэйгэ тиийэ тунуйда. Субу турар суудуналары көстүбэт оҥордо. Маннык хойуу буруоҕа сырыы бобуллар. Суудуналар уонна баарсалар сырыылара тохтотулла сырытта.
Мииринэй оройуонугар ыаллыы сытар Сунтаар улууһугар 107 гектар иэннээх сиргэ тыа умайар. Ол буруота хотугулуу-илин тыал “көмөтүнэн” кэлэн, алмаастаах кыраай киинин толорон, дьону ыксатта. От ыйын 26-27 күннэригэр Москубаҕа, Екатеринбурга, Дьокуускайга, Иркутскайга, Новосибирскайга сөмөлүөттэр кыайан көппөккө олордулар. От ыйын 29 күнүгэр Мииринэй куоратыгар, эбиэт саҕана эмиэ тыал күүһүнэн, ойуур баһаардарыттан хоп-хойуу буруо дьайҕарда. Бу күн өссө халлаан сөрүүкээн, дьон холкутук тыынар буолла.
Станислав Алексеев, Мииринэй куората.
