“Быйыл сайын ардаҕа суох, оҕо-аймах оонньууругар үчүгэй да сайын буолан ааста”, — диэҕи, кураан туран, ойуур баһаара элбээтэ. Баһаар элбэх хорумньуну таһаарда. Ырыаҕа ылланар, хоһооҥҥо хоһуллар хатыҥ чараҥнаах, кэрэ айылҕалаах Табалаахпыт барахсан баһаартан улаханнык эмсэҕэлээтэ, буорайда.
Нэһилиэкпит дьоно сайыны быһа баһаары кытта охсустулар. Дьаһалта өттүттэн улахан үлэ барда. Дьон бөлөҕүнэн, биригээдэнэн арахсан, хоно сытан үлэлээтилэр. Бөһүөлэккэ баар тиэхиньикэ эмиэ барыта тахсыбыта.
Ил Дархан Айсен Николаев баһаар буола турар сиригэр кэлэн, илэ хараҕынан көрөн барбыта. Дьокуускай куораттан МЧС бөртөлүөтэ баһаарынай биригээдэлэри аҕалан көмөлөстүлэр.
Мин ийэм Татьяна Васильевна түөлбэ салайааччытынан үлэлиир, убайым Айсен Чурапчыга МЧС үөрэҕэр үөрэнэр. Мин быйыл V кылааска үөрэнэ киирдим. Биһиги, оҕолор, баһаарга үлэлиир дьоммутугар түөлбэлэринэн тус-туспа мунньан, бурдук аһы, үүтү тастыбыт.
Сайыны быһа уоту утары күүстээх үлэ барда. Ол эрээри, билигин да баһаарбыт уоскуйбат, нэһилиэкпит тула өттүттэн күөдьүйэ турар. Дьон сайыны быһа оттоон муҥнаммыт отторун былдьаттылар. Бөһүөлэктэн олох аҕыйах көстөөх сиргэ умайар. Бөһүөлэк иһэ буруо, дьон мааскалаах сылдьаллар.
Бу кылгас сайыммытыгар ыраас салгынынан тыымматыбыт. Сайын устата аҕыйах эрэ күн “халлаан күөх өҥнөөх этэ” диэн көрдүбүт. От-мас эрдэ хагдарыйан бүппүтэ. Буруо диэн наһаа сүрдээх буолар эбит, сыта бөҕө, киһи хараҕа аһыйар. Чугас соҕус турар дьиэ да көстүбэт. Кыра наадалаах киһи таһырдьа тахсыбат үлүгэрэ. Бэл, итии салгын охсуллан кэлэрэ биллэргэ дылы. Уот Ыылаахха дьон олорор дьиэтигэр чугаһаан эрэр буолан, дьон аны ону умуруора барбыттара. Мээтискэ эмиэ оннук. Аара суолга ойуур умайа турар үһү.
Буорбут торф буолан, кыһыны быһа сир аннынан умайа сытыа дииллэр…
Айылҕабыт барахсаны харыстыаҕыҥ, уоттан сэрэхтээх буолуоҕуҥ!
Афоня Эверстов, V кылаас, Табалаах, Дьааҥы.
