Өрөспүүбүлүкэ салалтата алтынньы ый ортотугар диэри ойуур уотун умулларыыга үлэлээбит дьоҥҥо төлөбүрү уонна туһаныллыбыт тиэхиньикэ ороскуотун түһэриэ.
“Ойуур баһаарын умулларыыга үлэлээбит дьоҥҥо төлөбүрү кэмигэр ыытар туһунан Ил Дархан Айсен Николаев дьаһала баар. Харчы баар, оройуоннартан наадалаах докумуоннары күүтэбит”, – диэн вице-премьер Денис Белозеров өрөспүүбүлүкэтээҕи хамыыһыйа мунньаҕар эттэ.
Быйыл баһаарга үлэлээбит олохтоох дьоҥҥо бырабыыталыстыба 390 мөл солк үбү көрдө. Ол эрэн, сорох оройуоннарга докумуоннарга итэҕэстэр бааллар. Ону таһынан, болдьоҕуттан уһаталлар. Ордук Дьааҥы, Ленскэй уонна Сунтаар оройуоннара.
Онон сибээстээн өрөспүүбүлүкэтээҕи ыксаллаах быһыы-майгы хамыыһыйата, кэлэр нэдиэлэ ортотугар диэри докумуоннары бэлэмнээһиҥҥэ сорудах ылбыт. “Биһиги алтынньы ый ортотугар диэри баһаарга үлэлээбит дьону барыларын кытта төлөһүөхтээхпит”, – диэн Денис Белозеров эттэ.
