Сир баайын хостоору дьон сири-уоту тэпсибэт кэмигэр, үтүө да дойду этэ. Бүлүүчээн үрэх Бүлүү өрүскэ силбэһэр киэҥ дуола – кэрэ сир.
Былыр манна «хардаҕас саҕа» тууччах, эмис хатыыс, бил, үрэх төрдүгэр сэмсиирин кырдьаҕастар кэпсииллэрэ. Билигин күстэх, алыһар аҕыйаабытын да иһин, суолтатыгар син баара үөрдэр. Халлаан лаппа сылыйан, дьон Бүлүүчээн төрдүгэр балыктыыр буоллулар. Мииринэйтэн, Кириэстээхтэн дьон сөбүлээн сынньана кэлэллэр. Урут баһаамы "хоторор" буоллахтарына, билигин "бултуйуу" сэмэй. Ол оннугар дьон көй салгынынан дуоһуйа тыыналлар, айылҕаттан күүс-уох ылаллар.
Станислав Алексеев, Мииринэй куората.