Урбаанньыт Константин Чугунов уонна Аллараа Халыма оройуонун “Чобул” юкагирдар төрүт общиналарын баһылыга Сергей Семенов, Саха сирин билимҥэ Академиятыгар сэлии баһын уҥуоҕун биэрдилэр.
Саха сирин билимҥэ Академиятын сэлиилэри үөрэтэр салаа научнай үлэһитэ Валерий Плотников: “Бу бас үҥүоҕа олус ураты уонна бүтүн сылдьар. Сыҥааҕа, тиистэрэ эҥин бааллар. Сэлии баһын уҥуоҕун дөрүн-дөрүн булаллар. Тоҕо диэтэххэ, олус кэбирэх уонна тоҥ сиргэ түргэнник алдьанар. Инньэ гынан, тиэйиитэ уустуктардаах. Константин Чугуновка бэйэтэ тиэйэн аҕалбытыгар улахан махтал. Биһиги пуондабытыгар баара-суоҕа 3-4 бас уҥуоҕа баар. Ол эрэн, бу курдук ураты суох”.
Барыллааһын быһыытынан, бу сэлии орто саастаах, тыһы буолуон сөп.
Константин Чугунов: “Сергей Семенов бу бас уҥуоҕун биһиги учаастакпытыттан ааспыт сылга булбута. Наукаҕа наадалаах булумньулары Саха сирин билимҥэ Академиятыгар биэрэн иһэбит. Бу бастакы кылааппыт буолбатах, бу сылга сэлии аһыытын биэрбиппит. Ону таһынан, Москубатааҕы Дарвиновскай түмэлгэ сэлии аһыытын бэлэхтээбиппит. Уус-уран түмэлгэ, муосчуттарга эмиэ куруук биэрэбит. Ону таһынан, олохтоох уонна кытай уустарыгар атыылыыбыт”.
