Нью-Йорктааҕы зоопаркаҕа 4 саастаах Надя диэн малайскай тыһы тиигир киһиттэн коронавирус ыарыыга сутуллубут. Бу аан дойдуга тиигир киһиттэн сутуллуутун бастакы туоһута. Бу туһунан айылҕаны кэтээн көрөр уопсастыба (WCS) саайтыгар суруллар.
Коронавирус тиигири көрөр-харайар үлэһиттэн сыстыбыт. Үлэһит коронавирустааҕын туһунан туох да биллэр-көстөр симптома суох эбит.
Иһитиннэрэллэринэн, билигин зоопаркаҕа баар Надя балта Азул уонна икки амыр тиигирэ уонна үс африка хахайа кураанаҕынан сөтөллөн саҕалаабыттар. Онон кинилэргэ сотору кэминэн коронавирус анаалыһын оҥоруохтара.
Бу иннинэ коронавирус киһиэхэ дьиэ кыылыттан сыстыбат диэн сылыктыыллара. Тоҕо диэтэр, кыыллар бу инфекция киһи олоҕор суоһаабат атын көрүҥүнэн ыалдьаллар диэн кэпсээбиттэрэ. Биллэрин курдук, Ухань куоракка куоскалар маассабайдык ыалдьыбыт түбэлтэлэрэ баар. Маны таһынан, Гонкоҥҥа биир дьахтар ытыттан сыстыбыта биллэр. Дьиктитэ диэн, бу ыт туох да биллэр симптома суох эбит. Арай анаалыс түмүгүнэн биирдэ ыт ыарыылааҕа биллибит.
