Бүгүн, муус устар 13 күнүгэр, Иркутскай уобалас Усть Кут куоратын аннынан Өлүөнэ мууһа хамсыыра бэлиэтэннэ. Бу туһунан уу ресурсатын федеральнай ааҕыныстыбатын Өлүөнэтээҕи бассейн уу управлениетын саайтыгар суруллар.
“Быйыл Иркутскай уобалаһыгар саас хаһааҥҥытааҕар да эрдэлээн,муус устар 13 күнүгэр Усть Кут куорат аннынан бастакы муус хамсааһына бэлиэтэннэ. Бу иннинэ Усть Кут аннынан өрүү муус ыам ыйын 3 күнүгэр хамсааччы этэ”, - диэн саайтка суруллар.
Иркутскайдааҕы Гидрометеоцентр сылыктыырынан, Усть Кут аннынан Өлүөнэ мууһун устуута муус устар 25 күнүгэр күүтүллэр, оттон Киренскэй аннынан – муус устар 28 күнүгэр. Муус үөһээҥҥи өттө устуутугар харыы тахсыан сөп, оччотугар уу таһыма эмискэ үрдээн, намыһах нэһилиэнньэлээх пууннар халааҥҥа хаайтарыахтарын сөп. Сааскы муус устуутугар Өлүөнэ өрүс үөһэ тардыытыгар уу таһыма нуорматтан 20-90 см тахсыан сөп.
