Саха сирин өрүстэригэр муус быйыл нуорматтан икки-сэттэ күн эрдэлээн арыллыаҕа. Бу туһунан Гидрометеосулууспа Саха сиринээҕи салаатын начаалынньыгын солбуйааччы Татьяна Маршалик иһитиннэрэр.
Муус устар 10 күнүээҕи туругунан, өрүстэргэ муус халыҥа 60-100 см тэҥнэһэр. Индигииргэ, Өлүөнэ алын тардыытынан, Алдаҥҥа, Бүлүүгэ – 130-170 см. Урукку сылларга холоотоххо, муус халыҥа быйыл 10-35 см чараас. Арай Өлүөнэ, Бүлүү үөһээ тардыытынан уонна Зырянка аннынан Халыма өрүскэ муус халыҥа нуорманы баттаһар.
“Өрүстэргэ муус хамсааһына нуорматтан 2-7 күн эрдэлиэҕэ. Ыам ыйын бастакы декадатыгар муус Өлүөнэ уонна Алдан үөһээ тардыыларыгар устуоҕа. Ыам ыйын иккис декадатыгар – Өлүөнэ орто устуутунан, Дьокуускайга муус ыам ыйын 12 күнүгэр устуоҕа, Алдаҥҥа, Аммаҕа уонна Бүлүүгэ муус хамсыаҕа. Ыам ыйын бүтүүтэ – Өлүөнэ алын тардыытыгар, Анаабыр, Өлөөн, Дьааҥы, Индигирка уонна Халыма өрүстэригэр устуоҕа”, - диэн Татьяна Маршалик иһитиннэрэр.
Кини этэринэн, хотугулуу-илиҥҥи өрүстэргэ уонна Өлүөнэ бассейыныгар уу муҥутуур таһыма урукку сыллар кэтээн көрүүлэрин орто көрдөрүүтүгэр тиийиэҕэ. Арай Өлүөнэ Ленскэй улууһугар уонна Дьааҥы өрүскэ нуорматтан 1-2 м тахсыаҕа, оттон Амма, Халыма өрүстэригэр нуорматтан 1 миэтирэҕэ дылы, Халыма өрүс Зырянка уонна Орто Халыма аннынан муҥутаан кутталлаах кирбиини куоһарыан сөп.
“Муус харар түгэнигэр, уу таһыма Өлүөнэҕэ Нам улууһугар, Дьокуускай куорат аттынааҕы нэһилиэктэргэ кутталлаах буолуон сөп. Оттон Алдан өрүскэ муус харыыта таҕыстаҕына Уус Алдаҥҥа кутталы үөскэтэр, Амма өрүс ортотунан, Халыма өрүс Үөһээ уонна Орто Халыма улуустарыгар халааннатыан сөп”, - диэн ЯУГМС начаалынньыгын солбуйааччыта сылыктыыр. Маны таһынан, уу таһыма үрдээһинэ муус барар кэмигэр халаан туруга хайдах буоларыттан эмиэ быһаччы тутулуктанар.
