Халыма өрүскэ Орто Халыма куоратыттан аллараа 18 км Лобуйа диэн сиринэн муус сол хатан турар. Бу туһунан Өлүөнэтээҕи уу бассейнын управлениетын пресс-сулууспата иһитиннэрэр.
“Орто Халыма куорат аннынан муус сэдэхтик устар. Олохтоох бириэмэннэн 18 чааска уу таһыма 1242 см, оттон кутталлаах кирбиитэ – 1200 см”, - диэн суруйаллар. Муус харбыт сиригэр 8 төгүл дэлби тэптэрии үлэтин ыыппыттар. Уу таһыма үрдээн, 12 уһаайба ууга барбыт, 46 киһини эвакуациялаабыттар. Орто Халымаҕа муниципальнай таһымнаах ыксаллаах балаһыанньа эрэһимэ биллэриллибит. Маны таһынан ууга 1600 м куорат суоллара уонна аэропорт көтөр балаһатын улахан аҥара ууга олорор.
Эрдэ иһитиннэрбиппитинэн, Арассыыйа ыксаллаах быһыыга-майгыга министиэристибэтин өрөспүүбүлүкэтээҕи салаатын 20 үлэһитэ Орто уонна Үөһээ Халыма улуустарыгар ыытыллыбыттара.
