Ыам ыйын 26 күнүнээҕи туругунан, өрөспүүбүлүкэҕэ 8 ойуур уотун умуллараллар: Үөһээ Бүлүүгэ, Намҥа, Уус Майдаҕа, Мэҥэ Хаҥаласка – биирдии, Сунтаар уонна Ньурба улуустарыгар – иккилии. Уопсайа 241 гаа сиргэ уот күүдэпчилэнэр. Бу туһунан СӨ Экология министиэристибэтин пресс-сулууспата иһитиннэрэр.
Билиҥҥитэ Мэҥэ Хаҥаласка уоту умулларбыттар. Ааспыт суукка устата 7 ойуур уотун тохтоппуттар.
Баһаары умулларыыга 242 киһи, ол иһигэр 85 парашютист уонна десантник, 50 сиринэн сылдьан ойууру кэтиир үлэһит, 10 лесничество үлэһитэ, 7 ЫБММ үлэһитэ уонна 90 олохтоох киһи сылдьар. Уопсайа 32 уоту бохсор тиэхиньикэ үлэлиир. Мэҥэ Хаҥаласка уот этиҥтэн сылтаан тахсыбыт буолуон сөп, оттон атыттарга – киһи дьалаҕайыттан.
Киһи кыайан мээнэ тиийбэт, кый ыраах сирдэргэ (онно уоту умулларбаттар) 8 уот турбута бэлиэтэнэр: Эбээн Бытантайга, Дьааҥыга уонна Томпоҕо (уопсайа 545 гаа).
