Суукка устатыгар Саха сиригэр 70 ойуур уотун умуллардылар. Дьолго, саҥа уот көрдүгэнэ суох. Билигин өрөспүүбүлүкэ сиригэр-уотугар 113 ойуур баһаара турар. Уопсайа баһаар сезона саҕаланыаҕыттан 622 ойуур уота бэлиэтэммит. Бу туһунан эрэгийиэннээҕи ЫБММ салаата иһитиннэрэр.
“Ыарахан балаһыанньа Дьааҥы, Эдьигээн, Мииринэй, Томпо уонна Эбээн Бытантай улуустарыгар турар. Онно 65 ойуур уота бэлиэтэнэр. Сүрүн күүһү нэһилиэнньэлээх пууннар аттыларыгар күүдэпчилэнэр уоту умулларыыга уурабыт, минерализованнай балаһа, уот салгыы тарҕамматын курдук дьаһаллары ыллыбыт”, - диэн ЫБММ Саха сиринээҕи сүрүн управлениетын салайааччы Павел Гарин иһитиннэрэр.
Баһаары умулларыыга 880 киһи уонна 86 тиэхиньикэ тардыллыбыт. Баһаары маныырга уонна көмөнү оҥорорго Сүрүннүүр управление 90 үлэһитэ уонна 9 тиэхиньикэ, Хабаровскайтан Дьааҥы улууһугар МИ-8 бөртөлүөт бэлэм олорор.
