Балаҕан ыйын 15 күнүнээҕи туругунан, Саха сиригэр Алдан, Горнай уонна Таатта улуустарыгар барыта 15 сиргэ ойуур уотун утары охсуһаллар. Ол туһунан СӨ Экологияҕа министиэристибэтэ иһитиннэрэр.
Горнайга, Алдаҥҥа, Аммаҕа, Уус Алдаҥҥа, Чурапчыга уонна Тааттаҕа 10 баһаары бохсубуттар. Уот барыта 828,8 гаа иэннээх сири имири салаан ааспыт.
Суукка иһигэр хонтуруолланар сиргэ 2 баһаары умулларбыттар. Онно барыта 332 киһи, 63 араас тиэхиньикэ сылдьыбыт.
Суола-ииһэ суох, киһи-сүөһү тиийбэт, СӨ бырабыыталыстыбатын ыксаллаах быһыыга-майгыга кэмитиэтин быһаарыытынан уоту утары охсуһуу тохтотуллубут сирдэригэр барыта 72 гаа иэннээх 8 термоточка баара бэлиэтэнэр. Олору күннэтэ куосумастан спутнигынан кэтээн көрө олороллор. Уот нэһилиэнньэҕэ уонна социальнай эбийиэктэргэ суоһаабат.
